ХХЕГ: ТУВАД НАС БАРСАН ЦЭРГИЙН ХЭРГИЙГ ТАГНУУЛ ШАЛГАЖ БАЙНА

Завхан аймгаас Увс аймгийн Баруунтуруунд цэргийн албанд татагдсан цэрэг 2019 оны нэгдүгээр сарын 30-нд харуулын байр дээрээсээ морь унаж, буу сум агсаж аваад хил даваад алга болсон гэх дуулиан дэгдсэн билээ. Харамсалтай нь, түүнийг Тувагийн нутаг дэвсгэрээс энэ сарын 2-ны өдөр амиа алдсан үед олсон. Талийгаачийг айлын мал туугаад хил давсан гэх мэдээлэл бий. Тэрбээр ангийнхаа ахлагчийн моринд өвс тавьж өгнө гэж хэлээд сураггүй болсон байдаг.

Одоогоор түүнийг гаднын нөлөөтэй амиа алдсан уу эсвэл осгосон уу, амиа хорлосон уу гэдгийг эцэслэн тогтоогоогүй байна. Эх сурвалжийн мэдээлснээр талийгаач алга болохоосоо хоёр хоногийн өмнө аавтайгаа утсаар яриад гэрийнхнээ санаж байгаа гэдгээ хэлжээ.

Одоогоор уг хэргийг Тувагийн тал шалгаж байгаа бөгөөд талийгаачийг тэнгэр рүү гурав буудаад, дараа нь өөрийгөө буудан хороосон байсан гэж Тувагийн талаас манайд мэдэгджээ.

Энэ хэргийг тодруулахаар бид Хил хамгаалах ерөнхий газартай холбогдоход "Хэргийг тагнуулаас асуу. Тагнуулынхан шалгаж байгаа" гэсэн хариулт өглөө. Өнөөдрийн байдлаар талийгаачийн шүүх эмнэлгийн дүгнэлт гараагүй байна гэсэн мэдээллийг өгч байна.