ШШГЕГ: ЦАГДАН ХОРИХ 461 ДҮГЭЭР АНГИЙН УДИРДЛАГУУДЫГ ҮҮРЭГТ АЖЛААС НЬ ЧӨЛӨӨЛЛӨӨ

ШШГЕГ-ын харьяа цагдан хорих 461 дүгээр ангид саатуулагдаж байсан шүүгч эмэгтэй амиа алдсан хэрэгтэй холбогдуулан ШШГЕГ-аас албаны дотоод шалгалт явуулсан талаараа өнөөдөр хэвлэлийн хурал хийлээ. Хэвлэлийн хурлын эхэнд, ШШГЕГ-ын дарга Ц.Амгаланбаяр "ШШГЕГ-ын даргын тушаалаар дэд даргаар ахлуулсан ажлын хэсэг байгуулж, дотоод хяналт шалгалтын ажлыг хийж гүйцэтгэлээ. Өнөөдөр Ерөнхий газрын даргын зөвлөлийн хурлаар уг шалгалтын дүнг хэлэлцээд тодорхой шийдвэрүүдийг гаргасан. Шалгалтаар тухайн үед үүрэг гүйцэтгэж байсан алба хаагчид тухайлбал, давхрын харуул хамгаалалтын ажилтан, дүрс бичлэгийн ажилтнууд ажлын байран дээрээ сонор сэрэмж алдсан.

Мөн ерөнхий эргүүлээр ажиллаж байсан ээлжийн дарга, ерөнхий эргүүл нар хариуцлага алдаж хяналтаа сулруулсан нь шалгалтаар тогтоогдсон. Тиймээс шалгалтын дүнг хэлэлцээд 461 дүгээр ангийн дарга болон харуул хамгаалалт эрхэлсэн дарга, бусад холбогдох ажилтнуудыг албан тушаалаас нь чөлөөлсөн" гэв.