НАЙЗ ОХИНОО 13 ДАВХРААС ТҮЛХЭЖ ХӨНӨӨЖЭЭ

Нийслэлийн Баянзүрх дүүргийн нутаг дэвсгэрт байрлах орон сууцны 13 давхраас залуу эмэгтэй унаж, нас барсан харамсалтай хэрэг гарлаа.

Уг хэрэг хоёр хоногийн өмнө буюу энэ сарын 9-10-нд шилжих шөнө Баянзүрх дүүрэгт байрлах нэгэн орон сууцанд гарчээ. Хотхоны 13 давхрын цонхноос 1997 онд төрсөн, 22 настай Ц гэх эмэгтэй унаж нас барсан байна. Хэргийн дуудлагын дагуу цагдаагийн жижүүрийн бүрэлдэхүүн шөнийн 01:25 цагт хэргийн газарт ажиллаж, талийгаачийн цогцсыг шүүх эмнэлэгт хүлээлгэн өгчээ.

Талийгаач нь өөрийн найз залуу болох 25 настай, Б гэгчтэй тус байранд хамтран амьдардаг байсан бөгөөд хэрэг гарсан өдөр хоорондоо маргалдаж байхыг байрны оршин суугчид харсан гэжээ.

Мөн зарим эх сурвалжууд талийгаачийн найз залуу Б тухайн өдөр Ц-г бусадтай хардаж улмаар 13 давхрын цонхоор түлхэж амь насыг нь хөнөөсөн байж болзошгүй гэж мэдээллээ.