Америкийн Флорида мужийн Лейк-Сити хотын удирдлага компьютерийн сүлжээг нь шифрлэгч вирус ашиглан дайрсан хакеруудад 460 мянган доллар төлсөн тухай орон нутгийн "WCJB-TV" суваг мэдээлжээ. Мэдээллийг нууцлан шифрлэгч вирус Лейк-Ситийн хотын захиргааны компьютерийн сүлжээг зургаадугаар сарын 10-нд дайрчээ. Улмаар хотын захиргааны мэдээллийн системд хадгалагдаж байсан бүх өгөгдлийг нууцлан шифрлэж, тусгай түлхүүргүйгээр ашиглах боломжгүй болгосон байна. Энэ хэргийг үйлдсэн хакеруудын бүлэглэл нь хотын захиргаанд хандан 42 биткойн төлөөд өгөгдлийн нууцлалыг тайлах түлхүүр худалдан авахыг санал болгосон аж.
Хотын захиргаа нь алдагдсан өгөгдлийн санг нөхөн сэргээхтэй холбоотой бүх зардлыг тооцож үзээд хакеруудад мөнгө төлөх нь илүү хямд гэж үзсэн тул ийнхүү нэхсэн мөнгийг нь өгөхөөр шийджээ. Хакерууд 42 биткойн буюу ойролцоогоор 460 мянган долларыг авсаны дараагаар өгөгдлийн нууцлалыг тайлах түлхүүрийг хотын захиргаанд өгөөд сураггүй болсон байна.
Үүнээс өмнө Амеркийн Ривьера –Бич гэдэг жижигхэн хотын захиргаа нь мөн адил хакеруудын дайралтад өртөөд аргагүйн эрхэнд 600 мянган доллар төлж байж нууцлалыг тайлдаг түлхүүр кодыг худалдан авсан хэрэг гарч байсан юм.
Сэтгэгдэл (0)
Сэтгэгдэл бичигдээгүй байна