КИРГИЗ НЬ УСНЫ НӨӨЦӨӨ ХАМГААЛАХЫН ТУЛД АЗИЙН БАНКНААС 38 САЯ ДОЛЛАРЫН ЗЭЭЛ АВЛАА

Киргизийн хууль сахиулагчид экс Ерөнхийлөгчөө баривчлах гээд бөөн юм болж байх зуур одоогийн Ерөнхийлөгч Сооронбай Жээнбеков нь "Усны эх үүсвэрийг цаг агаарын өөрчлөлт, байгалийн гамшигт тогтвортой болгох" төслийн хүрээнд Азийн банкнаас зээл авах тохиролцоонд гарын үсэг зуржээ.

Энэ төслийн хүрээнд Азийн хөгжлийн банкнаас 38,6 сая доллар авч усжуулах системийн шинэчлэл, газар тариалангийн усжуулалтын системийн удирдлагыг сайжруулах, байгалийн гамшгийг тэсвэрлэх чадварыг сайжруулахад зарцуулна. Энэ мөнгөний 16,8 сая долларыг нь буцалтгүй тусламж хэлбэрээр, 21,8 сая долларыг нь жилийн 1 хувийн хүүтэй 8 жилийн хөнгөлттэй зээл, энэ хугацааны дууссаны дараа жилийн 1,5 хувийн хүүтэй нийт 32 жилийн зээл хэлбэрээр олгоно.

Сүүлийн жилүүдэд дэлхийн дулааралтай холбоотойгоор Дундад Азийн орнуудад цэвэр усны хүртээмж, газар тариалангийн усалгааны усны хүртээмж нь том асуудал болж хувираад байгаа юм.

Харин Баривчлагдсан экс Ерөнхийлөгч Алмазбек Атамбаевыг Киргизийн Дотоод явдлын яамны мөрдөн байцаах ерөнхий газар авчирсан байна. Пүрэв гарагт Киргизийн экс Ерөнхийлөгч Атамбаевын гэрийг тусгай хүчнийхэн гурван ч удаа дайрсны эцэст эзлэн авч баривчилсан. Лхагва гарагт хийсэн анхны дайралтыг Атамбаев нь хамсаатнуудынхаа хүчээр няцаасан бөгөөд энэ үеэр тусгайгийн нэг албан хаагч амиа алдсан байна.

Атамбаевыг гэмт бүлэглэлийг толгойлогчийг шоронгоос хууль бусаар сулласан, Киргиздээ томд орох цахилгаан станцын засварын ажлаас мөнгө луйвардсан хэргээр шалгаж байсан бол одоо ажил үүргээ биелүүлж явсан цагдаагийн ажилтны аминд хүрсэн бүр ч ноцтой хэрэг тулгахаар болсон байна.Энэ зуур Атамбаевын дэмжигч олон мянган хүн Киргизийн нийслэл Бишкект хүрэлцэн ирж эсэргүүцлийн жагсаал цуглаан зохион байгуулж эхэлжээ. Зарим шинжээч нь байдал эвгүйтвэл Киргизд гурав дахь удаагаа хувьсгал гарч, төр эргэж магадгүй гэж үзэж байна.

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top