Арванхоёрдугаар сарын 18-нд Тажик ба Киргизийн хил дээр болсон зодооны үеэр зургаа тажик иргэн шархадсан тухай "RadiolOzodi" мэдээлсэн байна. Гэрчүүдийн мэдүүлснээр Киргизийн Баткен мужийн Кок-Таш тосгоны хэсэг оршин суугчид Тажикийн Чорхук тосгоны зөвлөлд багтдаг Сомониён суурины таван хүнийг зодсон байна. Хариуд нь суурины иргэд Кок-Ташийн хүмүүсийг зогсоохоор очиж, улмаар хоорондоо чулуу шидэлцэж эхэлжээ. Төд удалгүй Киргизийн хилчид тажикууд руу буудаж эхлэхэд тажик хилчид хариу болгон киргизүүд рүү гал нээсэн байна.
Үүнээс болж Тажикистаны районы төв эмнэлэгт зодуулж шархадсан зургаан хүн хүргэгдэн эмнэлгийн тусламж авсан байна. Хил дээрх байдал одоо хэвийн болсон бөгөөд орон нутгийн удирдлагууд, хилчид иргэдийн дунд эвлэрүүлэх ухуулга хийж байгаа аж. Хил дээр болсон энэхүү зодоонд хоёр талаас нийт хоёр зуу гаруй хүн оролцсон байна.
Үүнээс өмнө, 2019 оны есдүгээр сард Тажик ба Киргизийн хил дагуух өөр хоёр тосгоны оршин суугчдын хооронд болсон зодоон мөн л хилчид хоорондын буудалцан болж хувирахад дөрвөн хилчин амиа алдаж, 12 хүн шархадсан нэлээд ноцтой хэрэг гарч байсан юм.
Киргиз Тажик хоёрыг заагласан 970 км хилийн шугамын 519 км нь л албан ёсоор татагдсан зурвастай бусад хэсэг нь одоо болтол маргаантайд тооцогддог. Маргаантай хэсэгт оршин суудаг киргиз ба тажик иргэдийн хооронд бэлчээр, ус, газар булаацалдсан энэ мэт жижиг мөргөлдөөн тогтмол үүсэж байдаг. Киргизийн нутаг дээр тажикууд гол төлөв амьдардаг дөрвөн хэсэг газар байдаг тул мөргөлдөөн гол төлөв тэндээс эхэлдэг юм байна.
Сэтгэгдэл (0)
Сэтгэгдэл бичигдээгүй байна