Японы сайд АбэШинзо нь ямар болзол тавилгүйгээр Хойд Солонгосын удирдагч Ким Жон Унтэй уулзахад бэлэн байгаагаа мэдэгдсэн байна. Тэрээр шинэ он эхэлсэнтэй холбогдуулсан хийсэн хэвлэлийн бага хурал хийхдээ “Хамгийн чухал асуудал болох хулгайлагдсан иргэдийн асуудлыг аль болох хурдан шийдвэрлэхийн тулд би Ким Жон Ун тэргүүлэгчтэй ямар нэг болзол нөхцөл тавилгүйгээр биечлэн уулзахад бэлэн байна” гэжээ.
Абэ нь Хойд Солонгосын удирдагчтай уулзахад бэлэн талаараа сүүлийн хэдэн сарын турш нэг бус удаа мэдэгдэж байгаа юм. Өнгөрсөн зууны 70-аад оны үед Хойд Солонгосын тагнуулын албаныхан хулгайлсан япончуудын нутагт нь буцаах хэрэгт ахиц гаргах үүднээс ийм уулзалт хийх зайлшгүй шаардлагатай гэж Абэ үзэж байгаа аж.
Хулгайлагдсан иргэдийн асуудал нь хоёр орны харилцаан дах хамгийн эмзэг сэдвийн нэг юм. Хойд Солонгос нь Японы 13 иргэнийг хулгайлсан гэдгээ 2002 онд албан ёсоор хүлээн зөвшөөрч, таван хүнийг нутаг буцахыг зөвшөөрсөн байдаг. Бусад хүмүүсийг нас барсан гэж мэдэгдээд төрөл төрөгсдөд нь цогцсыг нь явуулсан ч шинжилгээ хийх явцад алга болсон хүмүүсийн цогцос гэдгийг нь тогтоож чадаагүй юм.
Иймд 2014 оны тавдугаар сард Япон ба Хойд Солонгосын Засгийн газрууд нь япон иргэдийг хулгайлсан хэргийн талаар хамтарсан мөрдөн байцаалт явуулахаар тохиролцсон ч Пеньяны санаачилгаар энэ зорилгоор байгуулсан хамтарсан комиссыг татан буулгасан байдаг.
Сэтгэгдэл (0)
Сэтгэгдэл бичигдээгүй байна