Хятадын Засгийн газар Америкийн “Wall Street Journal” сэтгүүлийн Бээжин дэх гурван сурвалжлагчийн мэргэжлийн үйл ажиллагаа явуулах эрхийг нь хүчингүй болгосон тухайгаа мэдэгдлээ. Тус сэтгүүлийн Бээжин дэх сэтгүүлчид шинэ коронавирусийн тархалтыг зогсоох талаар Хятадын эрх баригчдын явуулж байгаа арга хэмжээг үгүйсгэсэн агуулга бүхий “Азийн жинхэнэ өвчтөн бол Хятад” гэсэн гарчиг бүхий нийтлэл хэвлүүлсэн тул ийм шийдвэр гаргасан гэдгийг БНХАУ-ын ГХЯ-ын албан ёсны төлөөлөгч Гэн Шуан мэдэгджээ.
Хоёрдугаар сарын 3-нд гарсан тус нийтлэлд Хятадын эрх баригчдыг коронавирусийн тархалтын талаарх бодит үнэнийг нууж байгаа гэж мэдэгдээд, цаашид яаралтай арга хэмжээ аваагүй тохиолдолд Хятадын эдийн засаг сүйрч магадгүй гэсэн таамаг дэвшүүлсэн байжээ.
Үүнийг Хятадын эрх баригчид эрс эсэргүүцсэн бөгөөд гарчиг нь бүхэл бүтэн улсыг үндэс угсаагаар ялгаварлан гадуурхсан агуулгатай гэж буруушаасан. Улмаар нийтлэлийг бичсэн сэтгүүлчдийг шийтгэж, алдаагаа хүлээн зөвшөөрч уучлал гуйхыг удаа дараалан шаардсан юм байна. Гэвч сэтгүүлийн удирдлага бодит арга хэмжээ аваагүй тул хариу болгож ийнхүү сэтгүүлчдийг нь Бээжинд мэргэжлийн чиглэлээр үйл ажиллагаа явуулахыг нь хориглох шийдвэр гаргасан аж.
Үүнээс гадна АНУ-ын Засгийн газар нь Хятадын хамгийн том төрийн мэдлийн мэдээллийг хэрэгслүүдийг Америкийн нутаг дээр үйл ажиллагаа явуулахад хатуу шаардлага тавьж байхаар болсонд эсэргүүцэл илэрхийлээд, удахгүй хариу арга авна гэжээ.
Ингэснээр хоёр их гүрний хооронд түр намжаад байсан худалдааны дайныг залгуулан мэдээллийн, сонин хэвлэлийн дайн эхэлж байгаа бололтой.
Сэтгэгдэл (0)
Сэтгэгдэл бичигдээгүй байна