Б.Баатархүү: Б.Цэгмид өөрөө цагдаагийн албан хаагчид миний биед халдаагүй гэдгээ хэлсэн нь бичлэгт байгаа

АН-ын дэргэдэх АЗХ-ны удирдах зөвлөлийн гишүүн, "машинтай жагсагч" Б.Цэгмид Өмнөговь аймгийн Даланзадгад хотод очиж, захиргааны байранд шаардлага хүргүүлэх үеэр үймээн үүсэж, цагдаагийн алба хаагчид Б.Цэгмидийг авч явсан байна. 

Тэрээр цагдаагийн байгууллагаас эмнэлэгт хүргэгдсэн бөгөөд өөрийг нь цагдаагийнхан зодсон тухай цахим хуудсаараа дамжуулан мэдээлсэн. 

Тэгвэл ЦЕГ-ын Хэвлэл мэдээллийн төвийн дарга, хурандаа Б.Баатархүү энэ талаар мэдээлэл гаргалаа. Тодруулбал,  “Өмнөговь аймгийн Цагдаагийн албан хаагч иргэн Цэгмидийн бие болон эрх чөлөөнд халдсан зүйл байхгүй. Иргэн Б.Цэгмид өөрөө цагдаагийн албан хаагчид миний биед халдаагүй гэж өөрөө хэлсэн нь бичлэгт байгаа. Хамт явж байсан хүмүүс нь гэрчилнэ. Тухайн иргэн өлсаж байна гээд хоол авч идсэн. Үүнийхээ дараа бие нь эвгүйтэж эмчийн тусламж авсан. Эмчийн зүгээс харшлын шинжтэй байна гэж хэлсэн. Эмчилгээ хийлгэж, хэвтэх үү гэж өөрөөс нь асуухад зүгээр ээ, хэвтэхгүй гээд гараад явсан. Болсон бүх процессыг нотлох камерын бичлэгүүд байгаа. Хэрэгтэй бол бичлэгийг тавьж болно” гэсэн тайлбар өглөө.