Арванхоёрдугаар сарын 22-нд Хятадын дөрөв, Оросын 15 байлдааны онгоц Өмнөд Солонгосын агаарын довтолгооноос хамгаалах хүчний ялган таних бүсд орж ирсэн тухай “asiae.co.kr” сайт мэдээлсэн байна.
Солонгосын эрх баригчдын мэдээлснээр эдгээр нь Хятадын “Xian H-6”, Оросын Ту-95 гэсэн стратегийн бөмбөгдөгч онгоцнууд байсан юм байна. Тэд Өмнөд Солонгос ба Япон хоёр булаацалддаг Лианкурын бүлэг арлуудаас зүүн тийш, Уллындо арлуудын орчим нислэг үйлдсэн байна.
Өөр эх сурвалжууд энэ талаар мэдээлэхдээ БНХАУ ба ОХУ нь Өмнөд Солонгосын удирдлагад дуулгалгүйгээр агаарын хилийнх нь орчим хамтарсан тусгай ажиллагаа явуулсан гэцгээж байна.
Үүний хариуд Хятадын тал онгоцнууд нь ердийн байлдааны нислэг хийж байсан, хоёр улсын онгоцнууд Өмнөд Солонгосын агаарын хилийг зөрчөөгүй гэжээ.
Агаарын довтолгооноос хамгаалах хүчний ялган таних бүс гэдэг нь тухайн нэг улсын агаарын орон зай эхэлдэг зурвас биш гэдгийг мэргэжилтнүүд онцолжээ. Гэхдээ гадаадын онгоцнууд энэхүү бүс рүү нэвтрэхийн тулд тухайн улсын цэргийнхэнд урьдчилж дуулган зөвшөөрөл авсан байх ёстой байдаг аж. Гэтэл Орос ба Хятадын онгоцнууд ийм зөвшөөрөл аваагүй гэж байна.
Энэ удаад болсон явдал нь өнгөрсөн оны долоодугаар сараас хойш анх удаагаа Орос ба хятадын онгоцнууд Өмнөд Солонгосын агаарын довтолгооноос хамгаалах хүчний ялган таних бүст хамтарсан арга хэмжээ явуулсан тохиолдол болжээ. Үүнээс өмнө буюу 2019 оноос хойш Хятадын байлдааны онгоцнууд энэхүү бүс рүү 30 удаа ойртож, Оросын онгоц 14 удаа ойртон Өмнөд Солонгос болон тэнд байрладаг Америкийн хүчний агаарын довтолгооноос хамгаалах хүчний боломж, чадварыг шалгаж байсан юм байна.
Сэтгэгдэл (0)
Сэтгэгдэл бичигдээгүй байна