Арванхоёрдугаар сарын 22-нд ОХУ ба БНХАУ-ын стратегийн бөмбөгдөгч онгоцнууд Японы тэнгисийн орчим хамтарсан эргүүл хийж ниссэнд Японы Засгийн газар санаа зовниж байгаагаа илэрхийлжээ.
Японы сайд нарын танхимын Ерөнхий нарийн бичгийн дарга Кацунобу Като нь “...Хятадын дөрөв, Оросын хоёр бөмбөгдөгч Япон тэнгис болон Зүүн Хятадын тэнгисийн дээгүүр хамтарсан нислэг хийсэн. Үүнтэй холбоотойгоор Японы өөрийгөө хамгаалах хүчний нисэх хүчний сөнөөгч онгоцнуудыг яаралтай агаарт хөөргөсөн болно. Бид энэ талаар Орос ба Хятадаас ямар ч урьдчилсан анхааруулга хүлээж аваагүй. Үүнтэй холбоотойгоор манай улс нь дипломат шугамаараа Орос ба Хятадын талд зовниж байгаагаа мэдэгдсэн болно” гэжээ.
Оросын Батлан хамгаалах яам нь хоёр улсын нисэх онгоцнууд олон улсын нислэгийн дүрмийн дагуу нислэг үйлдэж, нэг ч зөрчил гаргаагүй гэсэн тайлбар өгсөн байна.
“Sankei Shimbun” сонин энэ талаар мэдээлэхдээ Орос ба Хятадын онгоцнууд Өмнөд Солонгосын агаарын довтолгооноос хамгаалах хүчний ялган таних бүст орж ирсэн. Иймд Өмнөд Солонгос нь Японтой адилаар сөнөөгч онгоцоо агаартаа хөөргөж болох байсан ч Хятадын тал нислэгийн талаар урьдчилан мэдэгдсэн байсан тул хөөргөөгүй гэж тайлбарлажээ. Харин ОХУ нь Өмнөд Солонгосыг “агаарын довтолгооноос хамгаалах хүчний ялган таних бүс” гэгчийг 2013 онд дур мэдэн байгуулсан учир түүнийг нь хүлээн зөвшөөрдөггүй, энэ бүст нэвтрэх талаар Өмнөд Солонгост урьдчилан мэдээлдэггүй юм байна.
Сүүлийн үед ОХУ ба БНХАУ улсын цэргийн хамтын ажиллагаа эрчимжиж байгаад Япон ихээхэн сэтгэл түгшиж байна. Хятад нь Оросын хээрийн сургуульд оролцож, Орос нь пуужингийн довтолгооныг эрт илрүүлсэн систем байгуулахад нь Хятадад тусалж байна. Ийм замаар Орос, Хятад хоёр нь Өмнөд Солонгос ба Японд байрласан АНУ-ын цэргийн баазуудын боломжийг судалж байна гэж үзэж байгаа аж.
Сэтгэгдэл (0)
Сэтгэгдэл бичигдээгүй байна