Хойд Солонгос пуужин харваж, Өмнөд Солонгосын удирдлагууд яаралтай хуралдав

Хойд Солонгосын тал пүрэв гарагт Япон тэнгист баллистик пуужин харваж туршсаны дараагаар Өмнөд Солонгос Үндэсний аюулгүйн зөвлөлийн яаралтай хуралдаан зарлан хуралдсан тухай тус улсын Ерөнхийлөгчийн төлөөлөгч Кан Мин Сок мэдээлсэн байна.

 Яаралтай хуралдааны үеэр Үндэсний батлан хамгаалах яамны илтгэлийг сонсож, бий болсон нөхцөл байдлыг хэлэлцэх, хариу арга хэмжээний талаар ярилцана. Хойд Солонгосын харвасан хоёр пуужин ойролцоогоор 60 км-ийн өндөрт хөөрч, 430 км зай туулан Япон тэнгис унажээ. Үүний өмнө, өнгөрсөн ням гарагт Хойд Солонгос нь далавчит пуужин хоёрыг хөөргөн туршаад байсан юм. 

Ийм эгзэгтэй үеэр Оросын Гадаад хэргийн сайд ЛавровӨмнөд Солонгост айлчилжээ. Лавров нь Өмнөд Солонгосын Гадаад хэргийн сайд Чон Үн Ёнтой уулзаж, Солонгосын хойгийн асуудлаар ярилцсан байна. Хоёр сайд хамтарсан хэвлэлийн хурал хийх үеэр Солонгосын сайд нь “Бид COVID-19-ийн нөхцөл байдал тогтвортой болмогц Ерөнхийлөгч Путиныг Солонгос улсад хийх айлчлалыг аль болох хурдан зохион байгуулахын тулд хамтын хүчин чармайлт гаргахаар тохиролцлоо” гэсэн байна.

Путин нь Өмнөд Солонгост айлчлах тухай 2019 онд талууд тохиролцоод байсан ч цар тахлын улмаас хойшлуулсан байна.