УИХ-ын чуулганы хуралдаанаар 2022 оны төсвийн тодотголоор зарим Төрийн өмчит компаниудыг хувьчлах, татан буулгах, нэгтгэх асуудал орж ирсэн.
Энэ асуудалд УИХ-ын гишүүн, ХЗБХ-ны дарга С.Бямбацогт “Эрчим хүч, дулаанаа хувьчлаад, гадна дотны хөрөнгө оруулагч нарт өгвөл МУ бүрэн бүтэн байх, айл өрх, иргэд аюулгүй байх Үндсэн хуулийн эрхийн асуудал хөндөгдөх вий. Нэг талаар төрд нэг ч төгрөгийн орлого оруулдаггүй компаниудыг цэгцлэхийг дэмжиж байгаа боловч нөгөө талаар стратегийн ач холбогдол бүхий обьектыг хувьчлахдаа ялгавартай хандах ёстой гэж үзэж байна. Цахилгаан түгээх сүлжээ бол өөр. Гэтэл үйлдвэрлэж байгаа, дамжуулж байгаа стратегийн ач холбогдол бүхий салбараа хувьчилж болохгүй. 34 хувийн цаана төрийн өмчийн компани, удирдлагуудтай хуйвалдан хэн нэгэн хүнээс хараат болох асуудал үүсэх вий. Төр бол иргэддээ эдийн засаг, нийгмийн баталгааг хангаж, эрүүл аюулгүй орчинд амьдруулах үүрэгтэй. Гэтэл дулаан, цахилгаанаа хувьчлаад дараа нь доголдол зэрэг асуудал үүсвэл яах вэ. Тэр дундаа Эрдэнэбүрэн, Тайшир, Дөргөн, Богдын гол, Гуулан зэрэг УЦС-ын 34 хувийг хувьчлах асуудал оруулж ирснийг дэмжихгүй байна. Эрчим хүчний хараат байдлаас гарах тухай ярьсаар байхад, эргүүлээд хараат байдалд оруулах санаархлыг хэрхэвч дэмжихгүй” гэж байр сууриа илэрхийлсэн юм.
Сэтгэгдэл (0)
Сэтгэгдэл бичигдээгүй байна