УИХ дахь АН-ын бүлгийн өчигдрийн хурлаар тус бүлгийн ажлын албаны дарга С.Эрдэнэболд өөрийн хүсэлтээр ажлаа өгч түүний оронд тус бүлгийн ажлын албаны дэд дарга Б.Энхмөнхийг дэвшүүлэн томилжээ.
С.Эрдэнэболдын хувьд Харвардын их сургуулийг төгссөн Ардчилсан намын мэдлэг боловсролтой залуусын төлөөлөл бөгөөд тэрбээр Ардчилсан намын бүлгийн ажлын албаны даргын албыг есөн сар хашаад ийнхүү ажлаа өгчээ.
Харин түүний оронд УИХ дахь АН-ын бүлгийн ажлын албаны даргаар томилогдсон Б.Энхмөнх нь Ардчилсан намын ҮБХ-ны гишүүн бөгөөд өмнө нь Өмнөговь аймгийн Ардчилсан намын дэд даргаар ажиллаж байжээ. Түүний хувьд өнгөрсөн өвөл УИХ-ын Эдийн засгийн байнгын хорооноос зохион байгуулсан “Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах” ерөнхий хяналтын сонсголын үеэр иргэдийн төлөөллийг сонсголын үндсэн танхимд оруулсангүй гэх шаардлагыг зохион байгуулагчдад тавьж иргэдийн төлөөллийг сонсголын танхимд оруулж ирэн Төрийн ордонд үймээн дэгдээж байсан нэгэн юм.
Сэтгэгдэл (0)
Сэтгэгдэл бичигдээгүй байна