Г.Пүрэвдэлгэр: Жагсаал цуглаантай холбоотой 13 гэмт хэрэг бүртгэгдсэн

ЦЕГ-ын хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр мэдээлэл өглөө. Тэрээр “Нэгдүгээр сарын 7-ны өдөр Эрх чөлөөний эвсэл намаас Сүхбаатар дүүргийн Засаг даргад жагсаал, цуглаан хийх талаар албан бичиг хүргүүлсэн. Уг жагсаалыг холбогдох газар бүртгэсэн. Ингэснээр энэ сарын 11-нд Д.Сүхбаатарын талбайд жагсаал зохион байгуулагдсан. Тус өдрөөс хойш жагсаал цуглаантай холбоотой 13 гэмт хэрэг, зөрчлийн шинжтэй дуудлага, мэдээлэл Цагдаагийн байгууллагад бүртгэгдсэн. Үүнээс гэмт хэргийн шинжтэй долоо, зөрчлийн шинжтэй зургаан гомдол мэдээлэл бүртгэгдсэн. Мөрдөн шалгах ажиллагаа үргэлжилж байна. Жагсаалын үеэр хууль бус үйлдлүүд гарсан. Тухайлбал, иргэдийн хөрөнгийг устгаж гэмтээсэн, төрийн байгууллагын үйл ажиллагаанд саад учруулсан буюу төрийн тусгай албан хаагчийн биед халдсан. Гэмт хэргийн шинжтэй үйлдлүүд гарсан. Тиймээс прокурорын хяналт дор мөрдөн шалгах ажиллагаа үргэлжилж байна. Нийтийн хэв журам зөрчсөн. Тухайлбал, Сүхбаатарын талбай болон Төв шуудангийн дөрвөн замын уулзварын замын хөдөлгөөнийг хаасан. Мөн зүй бус үйлдлүүд гаргасан. Энэ мэт бүх асуудлыг цагдаагийн байгууллага шалгаж байгаа. Бусдын эрхийг зөрчих нь хууль бус асуудал" гэв.