Монгол хэл, бичгийн шалгалтын бүртгэл нөгөөдөр дуусна

2025 оны элсэлтийн ерөнхий шалгалт ирэх дөрөвдүгээр сард Монгол хэл, бичгийн шалгалтаар эхэлж байна. Боловсролын сайдын элсэлтийн ерөнхий шалгалтад оруулсан нэмэлт өөрчлөлтөөр 10, 11 дүгээр ангийн сурагчид монгол хэл, бичгийн шалгалтад оролцох боломж нээгдсэн.

Үүнтэй холбогдуулан Монгол хэл, бичгийн шалгалт хоёр өдөр буюу дөрөвдүгээр сарын 18, 19-нд болно. Дөрөвдүгээр сарын 18-нд буюу баасан гарагт 12 дугаар ангийн сурагчид, 19-нд буюу бямба гарагт 10 болон 11 дүгээр ангийн сурагчид шалгалтаа өгнө.

Монгол хэл, бичгийн шалгалтын бүртгэл энэ сарын 14-ний өдрийн 18:00 цагт дуусаж байгаа. Шалгуулагчид http://eyesh.eec.mn/ сайтаар нэвтрэн орж, хувийн мэдээллээ оруулан шалгалтаа сонгож бүртгэлээ албан ёсоор баталгаажуулна. 

МХБШ-ын агуулгын хүрээ 10-12 ангид ижил байх ч шалгалтын сэдэв, материал 10, 11 болон 12 дугаар ангийн шалгуулагчдад өөр байна.

10 болон 11 дүгээр ангийн шалгуулагчид босго оноог давсан тохиолдолд дахин уг шалгалтыг өгөхгүй байх боломжтой. Харин өөрийн авсан оноондоо сэтгэл хангалуун бус байвал дахин шалгалтад орж оноогоо ахиулах боломжтой гэнэ.