Каннын кино наадмын тэргүүн шагналыг Ираны найруулагч хүртлээ

Каннын олон улсын 78 дахь удаагийн кино наадмын үндсэн уралдаант хэсгийн шилдэг бүрэн хэмжээний киногоор Ираны найруулагч Жафар Панахигийн "Энэ бол зүгээр л осол байсан" (Yek tasadef sadeh) драм кино шалгарчээ.

Кино наадмын дээд шагнал болох “Алтан далдуу модны мөчир”-ийг түүнд бямба гарагт буюу өчигдөр болсон хаалтын ёслолын үеэр ёслол төгөлдөр гардуулсан байна.

Энэ бол Ираны найруулагч Каннын кино наадмаас хүртэж буй анхны шагнал биш юм. Тэрбээр 1995 онд "Цагаан бөмбөлөг" (Khers nist 1995) бүтээлээрээ “шилдэг дебют кино” төрөлд “Алтан камер” шагналыг хүртсэн байна.  2018 онд түүний "Гурван царай" (Se rokh, 2018) кино шилдэг кино зохиолын шагналыг хүртсэн бол 2022 онд "Баавгай байхгүй" (Khers nist, 2022) драм киногоороо шүүгчдийн тусгай шагналаар шагнуулжээ.

Жүжигчин Вагнер Мура Бразилын “Нууц агент” (O Agente Secreto) кинонд бүтээсэн дүрээрээ шилдэг эрэгтэй дүрийн шагналыг хүртжээ. Харин шилдэг эмэгтэй дүрийн шагналыг Афсиа Эрзигийн "Бяцхан Дерниер" (La Petite Derni re) кинонд тоглосон Надия Меллити хүртлээ.

Шилдэг найруулагчийн шагналыг бразил найруулагч Клебер Мендонсу Фильо “Нууц агент” киногоороо хүртсэн бол энэ жилийн шилдэг кино зохиолын шагналыг ах дүү Жан-Пьер, Люк Дарденн нарын “Залуу ээжүүд” (Jeunes mères) кинонд олгожээ.  Шилдэг богино хэмжээний кино төрөлд Тауфик Бархомын “Чамайг үхсэнд би баяртай байна” (I’m Glad You’re Dead Now) кино шалгарсан байна.

“Алтан камер” шагналыг Хасан Хади “Ерөнхийлөгчийн бялуу” (The President’s Cake) драм киногоороо хүртлээ. Шүүгчдийн тусгай шагналыг Хятадын найруулагч Би Ганы “Дахин төрсөн нь” (Kuang ye shi dai) кинонд олгожээ.