Францад нэгэн жирийн зураачийн уран зургийг судлах үеэр алдарт Леонардо Да Винчигийн цуут бүтээл "Мона Лиза" буюу "Жоконда"-гийн нүцгэн ноорог зургийг олж тогтоосноо урлаг судлаачид зарлалаа. "Мона Ванна" хэмээх энэхүү цээж нүцгэн бүсгүйн уран зураг нь XVI зууны үед бүтээгдсэн нь тогтоогдсон аж. Парисаас холгүй орших Кондегийн музейд энэ зураг өнгөрсөн зуунаас эхлэн хадгалагдсаар иржээ.
Луврын музейн урлаг судлаачид энэ бүтээлийг Леонардо Да Винчигийн ноорог бүтээл гэж таамаглаж буй юм байна. "Энэ бол хуулбар биш. Жинхэнэ бүтээл" гэж урлаг судлаач Матье Делдикк мэдэгджээ. Луврын музейн судлаач Бруно Моттин мөн "Энэ зураг бол XVI зууны үед хамаарна. Маш өндөр чанартайн зэрэгцээ Леонардогийн амьдарч бүтээж явсан үетэй яг таарч байгаа юм" гэж мэдэгдсэн байна.
"Мона Лиза" болон "Мона Ванна" зургууд нь бүсгүйн царай төрх, хэмжээ, гар, биеийн хөдөлгөөн зэргээрээ тун адилхан ажээ. Гэхдээ нэг асуудал байгаа нь Леонардо Да Винчиг урлаг судлаачид солгой гараараа бүтээлээ туурвидаг байсан гэж тодорхойлсон байдаг бол "Мона Ванна"-г баруун гараар зурсаныг тогтоожээ.
"Мона Лиза" буюу "Жоконда"-г Леонардо Да Винчи 1503-1505 онд бүтээсэн гэж судлаачид үздэг. Зураг дээр торгоны наймаачин Франческо дель Жокондогийн эхнэр Лиза Герардиниг дүрсэлсэн гэж үздэг билээ.
М.Болджин
Сэтгэгдэл (0)
Сэтгэгдэл бичигдээгүй байна