УИХ дахь МАН-ын 65 гишүүн өнөөдөр 33, 32-оороо тус, тусдаа хуралджээ. УИХ-ын чуулганы үдээс хойших хуралдаанаар Ерөнхийлөгчийн хоригийг хэлэлцэх болсонтой холбоотойгоор ийн хоёр тусдаа хуралдсан байна.
Эх сурвалжийн мэдээлснээр УИХ дахь 32-ын "бүлэг" Ерөнхийлөгчийн хоригийг хүлээн авах нь зүйтэй хэмээн үзжээ.
Мөн УИХ-ын даргын өрөөнд УИХ-ын дарга М.Энхболд, Ерөнхий сайд У.Хүрэлсүх, УИХ дахь МАН-ын бүлгийн дарга Д.Хаянхярваа нар энэ асуудлыг ярилцжээ.
УИХ-ын чуулганы үдээс хойших хуралдаанаар Ерөнхийлөгчийн хоригийг хэлэлцэх байсан ч МАН-ын бүлэг тав хоногийн завсарлага хүсэж, авлаа.
Ерөнхийлөгчийн зүгээс Ч.Хүрэлбаатарыг Сангийн сайдаар томилсон нь эрх ашгийн зөрчил үүсгэж байна хэмээн үзэж, хориг тавьсан юм.
Өнгөрсөн долоо хоногийн баасан гаригт МАН-ын бүлэг ээлжит бусаар хуралдаж, Ерөнхийлөгчийн хоригийг хэлэлцээд 100 хувийн саналаар хүлээн авах боломжгүй гэх шийдвэрт хүрсэн байсан ч өнөөдрийн хуралдаанаар хоёр тусдаа хуралдсан төдийгүй, бүлэг нь тав хоногийн завсарлага авсан нь Ч.Хүрэлбаатарыг сайдаар нь үлдээх сонирхлоосоо буцав уу гэх эргэлзээг дагуулж эхлээд байна.
Сэтгэгдэл (0)
Сэтгэгдэл бичигдээгүй байна