ДУБАЙН “БАЯН РИЧИ” БУЮУ ХЭРЭЭС ХЭТЭРСЭН ТАНСАГЛАЛ

Дубайн бизнесийн магнат Сайф Ахмед Белхасын хүү, 15 настай рашид Белхаса тансаг амьдралаа Инстаграмд сурталчилж, олон зуун мянган дагагчтай болжээ. Тэрээр "Баян Ричи" киноны гол дүр шиг хүссэн бүхнээ авах дуртай. Энэ жаал 30 мянган долларын тасалбартай, өндөр зэрэглэлийн онгоцоор зугаалж, алтан машин, брэнд хувцасыг оймс мэт сольж байна.

Рашид тансаг харшдаа арслан, бар, шимпанзе, үчинбэр, хар ирвэс зэрэг нэн ховор амьтдаар дүүрэн хүрээлэн байгуулжээ. Энэ амьтны хүрээлэндээ дэлхийн шилдэг оддыг цуглуулж, цагийг хамт өнгөрүүлдэг байна. Рашид "Алдартай рэпперүүд, жүжигчид, хөлбөмбөгчид гэр бүлээрээ манайд ирж амрах дуртай. Бүгд миний найзууд. Гэхдээ надад хүн бүртэй ярилцах цаг зав байхгүй, ядардаг юм" хэмээн хэвлэлд өгсөн ярилцлагадаа онцолжээ. Рашидын алдартнуудтай уулзах цагийг товлодог тусгай агентлаг ажилладаг байна.

Мөн тэрээр үнэтэй брэнд пүүз цуглуулах дуртай. Түүнд тус бүр нь 1900-8000 долларын үнэтэй 200 мянган хос пүүзний цуглуулга бий. Тэрээр сургуулиа хурдхан төгсөөд пүүзний дэлгүүр нээж, бизнес хийх мөрөөдөлтэй ажээ.