ГЭР БҮЛИЙН ДӨРВӨН ХҮН ГЭРТЭЭ ШАТАЖ АМИА АЛДЖЭЭ

Өнгөрсөн мягмар гариг буюу энэ сарын 21-нд нэг гэр бүлийн дөрвөн хүн гэртээ шатаж амиа алдсан харамсалтай хэрэг гарсан байна. Эх сурвалжийн мэдээлж буйгаар эл хэрэг Баянзүрх дүүргийн нутаг дэвсгэрт гарсан бөгөөд гал 17 цагийн орчимд гарсан байна. Онцгой байдлынхан болон цагдаагийн байгууллага, түргэн тусламжийнхан яаралтай очсон ч гэрт байсан эрэгтэй эмэгтэй хоёр хүн хоёр хүүхэдтэйгээ аль хэдийн амиа алдсан байжээ. Тодруулбал 49 настай эрэгтэй Э, 33 настай эмэгтэй А, долоон настай эмэгтэй О, зургаахан сартай эрэгтэй У нар байсан гэдгийг эх сурвалж мэдээллээ.

Гэхдээ энэ галыг ахуйн хүрээний гал гэж үзэхгүй байх үндэслэл байгаа юм байна. Учир нь гэр үүдний амбаар хэсгээсээ шатаж эхэлсэн гэж ойр хавьд нь харж байсан хүн мэдүүлжээ. Түүнчлэн орой 17 цагийн үед хүмүүс унтах болоогүй, эрт байсан учраас гэр дотор гал гарсан бол хүмүүс нь зугтаж гарах, ямар нэг байдлаар бүгдээрээ амиа алдах ёсгүй байсан гэх таамаг байгаа аж. Тиймээс эл харамсалтай хэргийг гадны нөлөөтэй байсан эсэхийг тодруулахаар Баянзүрх дүүргийн цагдаагийн хэлтэст эрүүгийн хэрэг үүсгэн, үргэлжлүүлэн шалгаж байна.

Үүнээс гадна мөн л тэр өдөр буюу 21-ны орой 20:30 цагийн үед Сонгинохайрхан дүүргийн 26 дугаар хороонд мөн л нэгэн айлын гэр шатжээ. Галын дуудлагын дагуу онцгой байдлын алба хаагчид есөн минутын дотор очиход тэр хавийн иргэд галыг унтраасан байсан байна. Харин шатсан гэрийн гадна талд 40 орчим настай эрэгтэй хүн гадны нөлөөтэй нас барсан байсныгНийслэлийн Цагдаагийн газрын удирдлага зохицуулалтын хэлтсийн жижүүрийн бүрэлдэхүүнд шилжүүлэн өгчээ. Эл хэргийг мөн л цагдаагийн байгууллага шалгаж байна.