ОХУ -ын төрийн өмчит "Ростех" корпорацийн охин компани болох "Автоматика" шинэ бүтээгдэхүүн үйлдвэрлэсэн нь олны анхаарлыг татжээ. Тус компанийн бүтээсэн "Круиз-К" хэмээх гар утас өндөр нууцлалтай учир хэрэглэгчийн яриаг сонсох боломжгүй юм.
Энэхүү утсыг төрийн өндөр албан тушаалтнууд, тусгай албаны ажилтнууд ашиглахад тохиромжтой гэнэ. Гэхдээ тухайн гар утас хэрэглэгчтэй ярьж байгаа хүн нь бас яг ийм маркийн утастай байж өндөр нууцлалтай яриа өрнүүлэх боломжтой аж.
Өөрөөр хэлбэл утсаар ярьж буй хоёр хэрэглэгч хоёул "Круиз- К" утастай байх ёстой. Шинэ бүтээгдэхүүний талаар харилцаа, холбооны технологийн салбарын мэргэжилтнүүд янз бүрийн үзэл бодолтой байна.
Оросын Telecom Daily агентлагийн шинжээч Денис Кусков "Яриа сонсохын эсрэг хамгаалалттай гар утсыг оросууд анх удаа бүтээж байгаа болохоос дэлхийн зах зээл дээр шинэ зүйл биш. "Круиз-К" утасны талаар хэлэхэд өндөр үнэтэй учраас зөвхөн улстөрчид, дарга сайд нараар хэрэглэгчид нь хязгаарлагдах болов уу. Мөн компанийн захирлууд ч худалдан авах байх. Харин дундаж давхаргын иргэд, төрийн албан хаагчид авахад үнэтэй тусах байх" гэжээ.
Сэтгэгдэл (0)
Сэтгэгдэл бичигдээгүй байна