МАН-ын Бага хурал өнөөдөр Тусгаар тогтнолын ордонд 11:00 цагаас зохион байгуулагдахаар товоо зарлаад буй.Бага хурлын эхэнд МАН-ын дарга У.Хүрэлсүх улс төрийн илтгэл тавьж, мэдээлэл өгөх аж. Үргэлжлүүлэн МАН-ын Хяналтын ерөнхий хорооны мэдээлэл сонсож, намын дүрмэнд нэмэлт өөрчлөлт оруулах асуудлыг хэлэлцэхээр төлөвлөөд байгаа юм.
МАН-ын Бага хуралд оролцохоор төлөөлөгчид Тусгаар тогтнолын ордон руу нэвтэрч байгаа бол хэвлэлийнхэн гаднах талбайд сурвалжлага бэлтгэн ажиллаж байна. Энэ үеэр УИХ-ын гишүүн Ж.Энхбаяр "Өнгөрсөн хугацаанд үргэлжилсэн урт хугацааны маргааны шийдвэрлэх гол гарц нь Бага хурал болж байна. Тиймээс Бага хурлаас тодорхой улс төрийн шийдвэрүүд гарч, үр дүнд хүрнэ гэдэгт итгэж байна" гэсэн мэдээлэл өглөө.
Мөн энэ үеэр УИХ дахь МАН-ын бүлгийн дарга Д.Тогтохсүрэн "Бага хурлаар манай нам улс төрийн нөхцөл байдлаар хэлэлцэж, тодорхой шийдвэр гаргах болов уу гэж харж байна. УИХ-ын үйл ажиллагаа гацаанд орчихоод байгаа. Асуудлаа олон талаас нь ярьж, УИХ намынхаа Бага хурлын шийдвэрийг хэрэгжүүлж ажиллах болов уу. Ирцийн хувьд харьцангуй сайн байна гэсэн мэдээлэл ирсэн. Намаас гишүүн хөөх асуудал бол ярихгүй байх" гэсэн мэдээлэл өгсөн юм.
МАН-ын Хяналтын ерөнхий хорооны дарга н.Батбаатар "Хяналтын ерөнхий хороо өчигдөр хуралдаж, дүгнэлт танилцуулсан. Энэ дүгнэлтээ танилцуулна. Манай намын дүрмэнд хөөх гэсэн заалт байхгүй" гэсэн юм. Эх сурвалжуудын зүгээс ч тэр "Намаас хэн нэгийг хөөхгүй. Гэхдээ нэр бүхий долоон хүнийг Бага хурлын гишүүнээс түдгэлзүүлнэ" гэсэн мэдээлэл өгсөн нь анхаарал татаж байгаа юм
Сэтгэгдэл (0)
Сэтгэгдэл бичигдээгүй байна