Монгол Улсын Ерөнхийлөгч Х.Баттулгын зүгээс М.Чинбат, С.Алиманцэцэг нарыг Монгол Улсын Ерөнхий прокурорын орлогчийн албан тушаалд томилох санал УИХ-ын дарга Г.Занданшатарт зөвшилцөхөөр хүргүүлсэн юм.
Өчигдөр УИХ дахь МАН-ын бүлгийн хурал дундуур орлогч прокурорт нэр дэвшигч нарын асуудлыг оруулсан. Иймд эрх баригч нар цаг сунган хуралдсан билээ.
УИХ дахь МАН-ын бүлгийн дарга Д.Тогтохсүрэн хэвлэлийнхэнд мэдээлэл өгөх үеэр орлогч прокурорын асуудлыг хэлэлцээгүй гэж худал ярьсан нь анхаарал татав.
Цаад учир шалтгааныг нь сонирхвоос М.Чинбат, С.Алиманцэцэг нарыг МАН-ын гишүүд яг үнэндээ голжээ.
Учир нь С.Алиманцэцэгт бодлогын хэмжээнд ажиллахад туршлага дутна гэсэн дүн тавьжээ. Тэрээр 1997 оноос хойш 20 жилийн турш прокурорын байгууллагад ажиллахдаа нэг ч удаа удирдах албан тушаалд томилогдож байгаагүй. С.Алиманцэцэгийг харин нэг удаа прокуророос 2012-2014 онд дэвшүүлж "МИАТ" ТӨХК-ийн хуулийн хэлтсийн даргаар тавьж байжээ. Тэр нь одоогийн ҮАБЗ-ийн Нарийн бичгийн дарга А.Гансүхийг Зам тээврийн сайдаар ажилласан үе таардаг. Энэ ч утгаараа түүнийг А.Гансүхийн хүн, ангийн андууд гэлцгээдэг аж.
УИХ-ын гишүүдээс дэмжлэг авч чадахгүй, тэдний шалгуурт бүдэрч буй дараагийн эрхэм Максимын Чинбат. Өнгөрсөн долоо хоногийн баасан гаригийн чуулганаар УЕП-оор Б.Жаргалсайханыг томилохыг дэмждэг орой УИХ-ын гишүүн С.Батболд Ерөнхийлөгчийн Тамгын газрын дарга З.Энхболдын өрөөгөөр зочлов.
Чуулганы хуралд тоотой харагддаг, ганц үг ганхийдэггүй хэлгүй, дүлий мэт гишүүн яагаад Ерөнхийлөгчийн суудаг давхраар гэнэт сэм зочлов гэдэг нь анхаарал татаж байв.
Гэтэл эх сурвалжаас авсан мэдээлэлээр М.Чинбатыг МАН-ын "Сү.Батболд"-ын фракци дэвшүүлж байгаа аж. М.Чинбат нь Сүхбаатар аймгийн харьяат бөгөөд аймгийнхаа ерөнхий прокуророор ажиллаж байхдаа таагүй шалтгаанаар тушаал буурч Багануур дүүргийн туслах прокуророор цөлөгджээ.
Улсын Ерөнхий прокурорын орлогчруу зүтгүүлсэн Сүхбаатар дүүргийн ахлах прокурор А.Цэрэнсодномын бичлэг задарч, түүнийгээ цагаатгаж, уснаас хуурай гарахаар зүтгэх болсон. Тэрээр өдөр бүр хэвлэлээр хальж, сольж ярьсаар сүүлдээ үнэн нь хаана байгаа нь мэдэгдэхгүй бантан болов.
Эдгээр хоёр прокурор А.Цэрэнсодномын араас орж сонин, сошиал хөөцөлддөг болох вий.
Хийсэн ажилтай, цэвэрхэн намтартай, салбартаа хүлээн зөвшөөрөгдсөн эрхэм прокуроруудыг санал болгоно уу?
Монгол Улсын Эрхэм Ерөнхийлөгч өө.
Н.ӨНӨРЦЭЦЭГ
Сэтгэгдэл (0)
Сэтгэгдэл бичигдээгүй байна