Гүржийн нислэлд өчигдөр дэгдсэн эмх замбараагүй байдал намжсангүй үргэлжилсээр байна. Хоёр өдрийн өмнө Гүрж-Оросын парламент хоорондын чуулганы хуралдааны үеэр Оросын Думын гишүүн С.Гаврилов хуралдааныг нээхдээ оросоор ярьсан, Гүржийн парламентын даргын суудалд суусан гэдэг шалтгаанаар гүржийн сөрөг хүчнийхэн парламентын ордон руу дайран орсоноор эмх замбараагүй байдал дэгдсэн билээ.
Хэт үндсэрхэг үзэлтнүүд ба "Нэгдсэн Гүрж", "Үндэсний нэгдмэл нам" гэсэн сөрөг хүчнийхэн анхандаа Оросыг үзэн ядсан уриа хашхиран, Оросын парламентын гишүүдийг тууж байснаа огт өөр мэдэгдэл хийгээд эхэлсэн. Тэд Гүржийн одоогийн эрх баригчид Орост худалдагдсан гээд Парламентын дарга, ДХЯ-ны сайд, Аюулгүй албаны дарга гэсэн гурван албан тушаалтныг нэн даруй огцрох, парламентыг тараагаад ээлжит бус сонгууль явуулахыг шаардаж эхэлсэн. Улмаар шаардлагыг нь биелүүлээгүй цагт тарахгүй гээд парламентын ордон руу дайрч довтолсон хэвээр байна.
Эрх баригч нам одоогоор буулт хийж парламентын даргыг огцруулжээ. Харин ДХ сайд, Аюулгүй албаны дарга нарыг огцруулах эсэх, парламентыг тараах эсэх нь тодорхойгүй байна.
Энэ дуулианаар Гүржийн Ерөнхийлөгч Беларусьт хийж байсан айлчлалаа зогсоон нутагтаа яаралтай буцаж ирсэн. Ирсэн даруйдаа улсад нь үүсээд байгаа бүхэнд Оросыг буруутгасан. Ингэснээр эрх баригч нам ч тэр сөрөг хүчин ч тэр хоёул энэ бүх үймээн самууны гол буруутан гэж буруутгалаа.
Оросын Гадаад харилцааны яам мэдэгдэл хийж иргэдээ Гүрж рүү аялахаас зайлсхийхийг зөвлөжээ.
Сэтгэгдэл (0)
Сэтгэгдэл бичигдээгүй байна