Уганда улсын нийслэл Кампалагийн том дүүргүүдийн эрүүл мэндийн байгууллагуудын ажилтнуудын 96,6 хувь нь ажлын үеэр гараа угаадаггүй тухай "Daily Monitor Uganda" сонин мэдээлжээ.
"WaterAid" байгууллага Кампалагийн эмнэлгийн байгууллагуудын усан хангамж, ариун цэвэр, ажилтнуудын хувийн ариун цэврийн байдлыг тогтоох зорилгоор тус судалгааг явуулсан. Судалгаагаар Кампала хотын 63 эмнэлгээс 46-г нь сонгон шалгахад 44 эмнэлгийн ажилтнууд нь ажлын үеэр гараа угаадаггүй болох нь тогтоогдсон байна.
Гараан угаадаггүй эмнэлгийн ажилтнуудын 65 хувь нь савангүй болохоор угаадаггүй, 41 хувь нь байгууллагад нь ус үгүй тул угаадаггүй болох нь тогтоогдсон. Эмнэлгүүдийн 78 хувь нь ус түгээх сүлжээний усыг, 17 хувь нь борооны усыг, 3 хувь нь цооногийн усаар угаадаг байхад 1 хувь нь нөөцөлсөн ус хэрэглэдэг болохыг харуулсан байна.
"WaterAid" нь НҮБ-аас 1981 онд Олон улсын ундны усны арван жилийг зарлахад байгуулагдсан олон улсын төрийн бус байгууллага. Энэ байгууллага нь усан хангамж, ариун цэврийн асуудлаар судалгаа явуулдаг бөгөөд 2018 оноос дэлхийн 34 оронд үйл ажиллагаа явуулж байгаа.
Сэтгэгдэл (0)
Сэтгэгдэл бичигдээгүй байна