ЗАВХАН АЙМАГТ ШУВУУ ҮХСЭН ШАЛТГААНЫГ ШАЛГАЖ БАЙНА

Завхан аймгийн Дөрвөлжин нууранд шувууд учир битүүлгээр үхжээ. Тодруулбал тус аймгийн Дөрвөлжин сумын нутаг Бага нууранд шувууд үхсэн тухай мэдээллийн дагуу наймдугаар сарын 30-ны орой аймгийн Онцгой комисс яаралтай хуралдаж, 31-ний өдөр ажлын хэсэг томилон газар дээр нь ажилласан байна. Бүх шинжилгээ хийх дээжийг авч, улсын төв лабораторит хүргүүлээд байгаа юм. Мөн үхсэн шувуудыг устгах, ариутгах, халдваргүйжүүлэх ажлыг шуурхай зохион байгуулжээ. Есдүгээр сарын 2-ны орой аймгийн Онцгой комисс дахин хуралдаж, тус нууранд ажиллаж буй хүмүүсийн хугацааг сунгах, ариутгал халдваргүйжүүлэлтийн хувцас хэрэгсэл, хоол хүнс, шатахуунаар хангахаар шийдвэрлэж, өнөөдөр буюу есдүгээр сарын 3-ны өглөө Зоонозын өвчин судлалын төвийн дарга н.Дашдаваагаар ахлуулсан комиссыг тус нуур луу явуулахаар шийдвэрлэсэн. Нууранд шувууд үхсэн шалтгаан нөхцөлийг тодруулах ажил үргэлжилж байгаа юм байна.