АНУ -ын одоогийн гадаад бодлого нь санамсаргүй байдлаар Оросын эдийн засгийг дэмжин бэхжүүлж байгаа тухай Америкийн "National Interest" сонин бичжээ. Вашигнтоноос авсан улс төрийн шинжтэй зарим арга хэмжээ нь Оросын эрчим хүчний салбарт багагүй дэмжлэг болсон. Жишээлбэл, АНУ нь Иран ба Венесуэлийн эсрэг хориг арга хэмжээ авч, эдгээр улсаас газрын тос экспортлохыг хориглож, хоригийг нь зөрчсөн бусад улс орнуудын эсрэг эдийн засгийн хориг арга хэмжээ авна гэж шахалт үзүүлсэн. Гэтэл энэ хоёр улсад олборлодог газрын тосны найрлага нь оросынхтой төстэй тул хориг арга хэмжээ авч эхэлмэгц эднээс газрын тос экспортолдог орнууд нь Оросоос газрын тос худалдаж авдаг болсон.
Ерөнхийлөгч Трамп Хятадын эсрэг худалдааны дайн зарласны дараа Орос нь маш бага зардлаар Хятадын эрчим хүчний зах зээл дээрх байр сууриа эрс бэхжүүлээд авсан юм байна. Учир нь, худалдааны дайн эхэлмэгц Хятадын тал Америкаас авдаг шингэрүүлсэн шатдаг хийнд худалдааны нэмэлт татвар ногдуулахаас өөр аргагүй болсон. Ийм нөхцөлд Оросоос авах боломжтой байгалийн шатдаг хий нь хамаагүй дээр сонголт болж хувирсан тул Хятадын компаниуд Оросын Арктик дахь шатдаг хий олборлох компаниудын хувьцааг худалдан авч, хөрөнгө оруулалт хийх болсон. Ингэснээр, өрнөдийн авсан эдийн засгийн хориг арга хэмжээний улмаас Арктик дахь газрын тос, шатдаг хийн орд газруудад олборлолт боловсруулалт хийхэд санхүүжилтийн асуудалтай тулгараад байсан оросууд мөнгөний тал дээр санаа зовох юмгүй болсон.
Ингээд зогсохгүй Орос нь Хятад руу нийлүүлдэг газрын тосны хэмжээгээр Саудын Аравиас даван гарч Бээжингийн №1 нийлүүлэгч болсон.
Мөн 2019 он дуусахаас өмнө "Сибирийн хүч" шатдаг хий дамжуулах хоолойг ашиглалт оруулснаар Хятад руу жил болгон 38 тэрбум куб метр хий нийлүүлдэг болно. Ингэснээр Хятад нь Оросын шатдаг хийн худалдан авалтаараа Германы дараа ордог хоёр дахь том импортлогч болж хувирах юм.
Сэтгэгдэл (0)
Сэтгэгдэл бичигдээгүй байна