2020/07/15
USD 2,811

ЯПОНЫГ ЗОРИХ СОЛОНГОС ЖУУЛЧДЫН ТОО 58 ХУВИАР УНААД БАЙНА

Н.Мичидмаа
2019/10/18

Өнгөрсөн есдүгээр сард Японыг зорьсон солонгос жуулчдын тоо 58 хувиар унасан тухай Японы Үндэсний аялал жуулчлалын байгууллага (JNTO) мэдээлснийг "KBS" уламжилжээ. "JNTO"-ийн мэдээлж байгаагаар өнгөрсөн есдүгээр сард Өмнөд Солонгосын 201 мянга 200 иргэн Японд айлчилсан нь өмнөх оны мөн үеийнхээс даруй 58,1 хувиар буурсан үзүүлэлт. Харьцуулахад, долоодугаар сард Японд очсон өмнөд солонгос жуулчдын тоо 7,6 хувиар буураад байсан бол наймдугаар сар гэхэд шууд 48 хувиар буурч байсан байна. Өмнөд Солонгос руу хийх экспортод хийсэн хориг нь жуулчдын тоог эрс бууруулаад зогсохгүй Японы компаниудад сөргөөр нөлөөлж эхэлсэн тухай Японы төв банкны төлөөлөгчид мэдээлсэн байна. Тухайлбал, өндөр технологийн үйлдвэрлэлд зайлшгүй шаардлагатай түүхий эдийг нийлүүлэхийг хориглосны дараагаар Өмнөд Солонгосын компаниуд ийм түүхий эдийг нийлүүлэх найдвартай өөр эх сурвалжууд олсон тухай Японы Төв банкны тайланд дурджээ. Үүнээс болж Япон нь Өмнөд Солонгосын зах зээлд эзэлдэг хувиа ихээхэн алдаж магадгүй гэж сэрэмжлүүлжээ.

Өмнөд Солонгосын шүүхээс Японы төмөрлөгийн үйлдвэрүүдийг Дэлхийн хоёрдугаар дайны үед албадан ажиллуулж байсан солонгос хүмүүсийн ар гэрт ихээхэн хэмжээний нөхөн төлбөр өгүүлэх тухай шийдвэр гаргасны дараа хоёр улсын харилцаа эрс муудсан юм. Өмнөд Солонгосын удирдлагууд шүүхийн шийдвэрийг цуцлаагүй төдийгүй нөхөн төлбөр гаргуулахын тулд Өмнөд Солонгос дахь Японы компаниудын хувьцааг хурааж эхлэхэд Японы эрх баригчид өндөр технолгийнүйдвэрт зайлшгүй шаардлагатай чухал түүхийг эдийг Өмнөд Солонгос руу гаргахад хязгаарлалт хийснээр энэ хоёр улсын дунд худалдааны чимээгүй дайн дэгдээд байгаа юм.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна