Грекийн зүүн хойд нутаг дахь Ксанти хотын орчим цагдаа нар хууль бус цагаачид дүүртэл чихсэн контейнер бүхий машиныг саатуулсан тухай "Xanthinews" сонин мэдээлсэн байна. Контейнер дотор 81 хүнийг чихэн Салоник хот хүртэл хулгайгаар тээвэрлэж байжээ. Цагдаа нар контейнер ачсан хүнд даацын тэргийг төлбөртэй хурдны зам руу орохоор төлбөр хийж байхад амжиж саатуулсан байна. Саатуулсны дараагаар контейнерт явсан 15 хүнд эмнэлгийн яаралтай тусламж үзүүлэх хэрэг гарчээ. Цагдаа нар машиныг зогсоож шалгаагүй бол тэдгээр хүмүүс Их Британид контейнер дотор бүтэж үхсэн 39 цагаачтай адил эмгэнэлтэй байдалд орж магадгүй байсан гэж байна.
Контейнерт битүүмжлэгдэн Их Британи руу хууль бусаар нэвтэрсэн 39 цагаач агаарын дутагдалд орж амиа алдсан явдал өнгөрсөн долоо хоногт Их Британид гарсан нь дэлхийн нийтийн анхаарлыг хууль бус цагаачлалын, хүний наймааг тойрсон асуудалд ихээхэн анхаарахад хүргэсэн юм. Зарим мэдээгээр контейнер дотор амиа алдсан 39 хүнийг хятад цагаачид гэж байгаа бол өөр мэдээгээр вьетнам цагаачид гэж мэдээлж байна. Энэ хэргийг зохион байгуулсан хэрэгт сэжиглэн Британид гурван хүнийг баривчилсан бол Вьетнамд найман хүнийг саатуулсан тухай мэдээ ирж байгаа. Хууль бус цагаачдыг контейнерт хийсэн машиныг Болгараас Их Британид ирсэн гэж үзэж байгаа юм байна. Машины байршил тогтоогч төхөөрөмж дээрх өгөгдлүүдийг шалгаж үзэхэд өмнө нь удаа дараалан Их Британи руу тээвэр хийж байсан бас цагаачдын бөөнөөр байршуулах төвүүдээр орж байсан нь тогтоогдсон байна.
Сэтгэгдэл (0)
Сэтгэгдэл бичигдээгүй байна