Албаны автомашиныг амин хувьдаа ашиглаж байсан нь ТАЗ, ЦЕГ-ын хамтарсан шалгалтаар ил болсон төрийн өндөр албан тушаалтай 30 орчим хүн бий. Тухайн шалгалт энэ сарын 1-ний өдрийн 07.00-09.00 цагийн хооронд явагдсан бөгөөд тухайн өдрөө манай сайт албаны автомашин болоод түүнийг ашиглагч төрийн албан тушаалтнуудын нэрийг ил болгож, мэдээлж эхэлсэн. Асуудал олон нийтэд хүрч, шүүмжлэл хөвөрч, төрийн байгууллагууд энэ асуудлаар дотооддоо ярьж эхэлсэн байхад ч энэ үйлдэл давтагдсаар байв.
Тодруулбал, тухайн өдрийн /2019.11.11/ 17.00 цагийн орчимд буюу сургуулийн хичээлийн цаг дуусах үеэр Монгол Оросын хамтарсан гуравдугаар сургуулийн гаднаас албаны автомашинаар хүүхэд зөөсөн хэвээр л байлаа. Тэр бол 98-76 УБМ улсын дугаартай тоёота ланд 200 маркийн, хар өнгийн автомашин байсан бөгөөд Тагнуулын ерөнхий газрын албан хэрэгцээний автомашин байв. Тэгвэл бид тухайн автомашиныг ямар албан тушаалтан ашигладгийг олсон юм. Тодруулбал, ТЕГ-ын Газрын дарга, Хурандаа цолтой Б.Н байлаа.
Албаны автомашиныг амин хэрэгцээндээ ашиглах нь Төрийн албаны хууль, Төрийн алба хаагчийн ёсзүйн дүрэмд тодорхой заасан. Мөн ТАЗ-өөс хяналт шалгалт хийж, асуудал хөвөрсөн үед ч санаа зовох зүйлгүйгээр албаны машиныг амин хувьдаа ашигласан энэ үйлдэлд тухайн автомашиныг ашиглагч хурандаа Б.Н-д ТЕГ дотооддоо хариуцлага тооцож, хуулийг хэрэгжүүлнэ биз.
Албаны автомашин, түүний жолоочийн цалин хангамж нь иргэдийн татвараар бүрддэг тул иргэд олон нийт, хэвлэл мэдээллийн хэрэгсэл асуудлыг хянаж, мэдээлж ажиллах юм.
Сэтгэгдэл (0)
Сэтгэгдэл бичигдээгүй байна