Пакистаны Стратегийн хүчний командлал "Shaheen I" баллистик пуужин амжилттай туршсан байна. Тус пуужингийн байлдааны бэлэн байдлыг шалгах үүднээс туршилтын хөөргөлт хийсэн гэж "Интерфакс" мэдээлж байна. "Shaheen I" нь ердийн болон цөмийн цэнэгт хошуу тээх чадвартай бөгөөд 750 км хүртэлх алсад байг онох чадвартай. Пакистан нь энэхүү пуужингаас гадна зэвсэглэлдээ "Shaheen II", "Shaheen III" гэсэн өөр хоёр төрлийн баллистик пуужинтай. "Shaheen II" нь 2000 км-ийн тусгалтай бол "Shaheen III" нь 2750 км-ийн тусгалтай.
Энэтхэгийн Засгийн газар Жамму ба Кашмир мужийг хоёр хуваахтай зэрэгцэн статусыг өөрчилж, автономийг нь халан Засгийн газрын шууд удирдлагад оруулснаас үүдэн Пакистантай харилцаа нь эрс муудаад байгаа. Пакистаны сөрөг хүчин нь Засгийн газраа Кашмир мужийг өмгөөлж, хамгаалах юу ч хийсэнгүй гэж шүүмжлээд төрийн эргэлт гаргаж түлхэн унагаад Кашмирыг зэвсгийн хүчээр чөлөөлөх тухай ярьж эхэлсэн үед цөмийн зэвсэг тээх чадвартай ойрын зайн тусгалтай пуужин харваж туршина гэдэг тун түгшүүртэй алхам гэдэгт олон шинжээч санал нийлжээ. Ийм нөхцөлд Энэтхэгийн удирдлага Оростой ойр ойрхон уулзаж агаарын довтолгоо, түүний дотор баллистик пуужинг амдан устгах чадвартай С-400 системийг нийлүүлэх ажлыг хурдавчлуулахыг яагаад хичээж байсан нь ойлгомжтой болж байна гэсэн мэдээ ирж байна.
Хамгийн сүүлд ирсэн мэдээгээр "Dubai Airshow 2019" нисэхийг үзэсгэлэн худалдаанд оролцсон ОХУ-ын "Ростех" корпорацын тэргүүн Сергей Чемезов Энэтхэгийн С-400-ийн талаарх асуултад хариулахдаа "Урьдчилгаа мөнгийг хийсэн. Яг хэдийг хийснийг тодруулахыг хүсэхгүй байна, ямар ч байсан урьдчилгааг хийсэн. Манай зүгээс үйлдвэрлээд эхэлсэн байгаа, бүх зүйл графикийг дагуу хийгдэнэ. Гэрээг 2025 онд гүйцэтгэж дуусна" гэж мэдээлсэн байна.
Үүнээс өмнө Энэтхэгийг Америкийн сүрдүүлгээс болоод Оростой байгуулсан С-400 авах гэрээгээ цуцалж магадгүй тухай яригдаж байсан. Харин одоо урьдчилгаа мөнгө нэгэнт төлөгдсөн учраас Энэтхэг ухрах боломжгүй боллоо.
Сэтгэгдэл (0)
Сэтгэгдэл бичигдээгүй байна