Үйлчлүүлэгчээ хүчирхийлэн дээрэмдсэн 29 настай таксины жолоочийг баривчилжээ

Өнгөрсөн ням гараг буюу нэгдүгээр сарын 19-ний шөнө таксины жолоочид зодуулж, хүчиндүүлж, эд зүйлээ алдсан гэх дуудлага мэдээлэл цагдаагийн байгууллагад иржээ. Тодруулбал,  Баянзүрх дүүргийн Жуковын музей орчмоос  таксинд суусан 23 настай эмэгтэйг таксины жолооч цохиж унаган, хүчирхийлж улмаар хоёр ширхэг гар утас, бэлэн мөнгө зэргийг дээрэмдээд орхиж явсан хэрэг гарсан байна. Хэрэг гарах үед хохирогч эмэгтэй согтууруулах ундааны зүйл хэрэглэсэн байсан ба таксины арын суудал дээр унтсан байхад нь ийнхүү ёс бус авирлажээ.

Уг хэргийг Баянзүрх дүүрэг дэх цагдаагийн Гуравдугаар хэлтсийн алба хаагчид шалгаж, холбогдогчийг эрэн сурвалжилснаар хэрэг гарснаас хэдхэн цагийн дараа илрүүлэн баривчилсан байна. Хэрэгт холбогдогч 29 настай, хувиараа такси үйлчилгээ эрхлэгч нэгэн байжээ.