Японы Ерөнхий сайд Абэ Синзо парламентдаа үг хэлэхдээ Оросоос Курилын арлуудыг буцаах авч, газар нутгийн маргааныг эцэслэхийн тулд эрс шийдэмгий арга хэмжээ авна гэжээ. Тэрээр “Бид газар нутгийн асуудлыг шийдэж, энхийн гэрээ байгуулна. Бид ийм үр дүн өөд ямар ч эргэлзээгүй явж байна. Ерөнхийлөгчийн хамтаар энэ зорилгод хүрэх зориг дүүрэн байгаа” гэжээ.
Япон нь Курилын арлуудыг өөрийн газар нутгийн салшгүй хэсэг гэж үзэн буцаан авахаар энэ мэт хичээл зүтгэл, мэдэгдэл олныг гаргадаг. Гэвч ОХУ нь эдгээр арлуудыг Дэлхийн хоёрдугаар дайны үеэр гаргасан хохирлын нөхөн төлбөрт авсан учраас, Японтой газар нутгийн ямар ч маргаангүй гэж мэдэгддэг.
Курилын арлуудыг буцаан авах яриа нь хүйтэн дайны үеэр анх гарсан. Зөвлөлт хүчирхэг байх үед энэ асуудлыг бүр огт авч хэлэлцдэггүй байсан бол Горбачевын үед эдийн засаг нь сулрахыг дагаад асуудал ахин сөхөгдөж, Горбачев нь 22 тэрбум долларын хариуд Курилын арлуудыг буцаан өгөх тухай аман тохиролцоо хийсэн ч хэрэгжүүлж амжааагүй тухай яриа байдаг. Зөвлөлт задарсны дараа ОХУ-ын эдийн засгийн тун хүнд байдалдтай байсан тул Курилын арлуудын асуудлыг Ельцины үед мөн л идэвхтэй сөхөж байсан. 1993онд Ельциныг Японд айлчлах үеэр арлуудыг Японд шилжүүлж магадгүй тухай яригдаж байсан ч Оросын Ерөнхийлөгчийн тойрон хүрээлэлд байсан хүмүүс арлуудыг асуудлыг сөхөхгүй болгож чадсан. Үүний дараа нь арлуудыг асуудал хэсэг намжаад 2014 онд Украйны “Майдан” хувьсгалын дараа АНУ тэргүүтэй өрнөдийн орнууд Оросын эсрэг бүх талын хориг арга хэмжээ авсны дараа Курилын арлуудын асуудал ахин сөхөгдөх болсон.
Сэтгэгдэл (0)
Сэтгэгдэл бичигдээгүй байна