Хятадын Коммунист намыг орчин цагийн гол  аюул гэжээ

АНУ-ын Төрийн нарийн бичгийн дарга Майк Помпео БНХАУ-ын Коммунист намыг орчин цагийн гол аюул заналхийлэл гэж нэрлэснийг “Reuters” агентлаг уламжилж байна.

Майк Помпео нь Лондон хотноо Их Британийн ГХЯ-ын сайд Доминик Раабтай уулзсаны дараа хамтарсан хэвлэлийн хурал хийх үеэр “Бид алан хядлагын талаар үргэлжлүүлэн дээд зэргийн анхаарал сэрэмжтэй байх ёстой ч ... Хятадын Коммунист нам нь манай цаг үеийн гол аюул заналхийлэл болж байна” гэж мэдэгджээ.

Хятадын Коммунист намын анхаарах зүйлс нь Америкийн үнэт зүйлсээс өөр гэдгийг удаа дараалан ойлгуулж байсан гэдгийг Майк Помпео онцолсон байна. Иймд дараагийн зуунд дэлхий дээр өрнөдийн ардчилсан үнэт зүйлс ноёлсон хэвээр байна гэдэгт бат итгэлтэй байхын тулд АНУ ба түүний өрнөдийн холбоотнууд цэргийн, технологийн хүчин чадлаар нэмэгдүүлэхийг чармайх хэрэгтэй гэж үзэж байгаа юм байна.

Үүний өмнөхөн АНУ-ын Ерөнхийлөгчийн Үндэсний аюулгүй байдлын зөвлөх асан Жеймс Жонс нь БНХАУ-ыг Америкийн ирээдүйн гол аюул гэж мэдэгдэж байсан юм. Тэрээр Хятад нь АНУ-ыг дэлхийн ноёлогч соёл гэдэг байр сууриас шахаж, өөрсдөө эзэн суухыг санаархаж байна гэж мэдэгдэж байсан аж.