2020 оны 05 дугаар сарын 06-нд Чингэлтэй дүүрэгт “Коронавируст /Covid-19/ цар тахлын үеийн харилцан ажиллагаа, хариу арга хэмжээ” сэдэвт гамшгаас хамгаалах иж бүрэн дадлага, сургууль зохион байгуулагдаж байсан юм. Энэ үеэр хөл, хориог амжилттай зохион байгуулж, санаачлага гарган ажилласан гэх үндэслэлээр албан тушаалтнуудыг Нийслэлийн Засаг даргаар ажиллаж байсан С.Амарсайхан захирамж гарган тус бүрт нь 1.000.000 төгрөгийн мөнгөн шагнал, урамшуулал олгосон баримтыг дэлгэж байна. Ингэхдээ Онцгой комиссын дансанд төвлөрсөн хандив тусламжийн орлогоос гаргахыг үүрэгдэж, түүгээр зогсохгүй нутгийн захиргааны байгууллага, дүүрэг хороо, харьяа хэлтэс, алба, албан тушаалтныг байгууллагын хэмжээнд төсвийн зохих зардлаас шагнаж урамшуулахыг нутгийн захиргааны байгууллагын дарга нартаа даалгасан байх юм. Хотын захирагчийн захирамжаар тухайн үеийн Нийслэлийн засаг даргын хөгжлийн бодлогын асуудал хариуцсан нэгдүгээр орлогч Ж.Батбаясгалан, Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр, Нийслэлийн ЗДТГ-ын дарга Ц.Уртнасан тэргүүтэй нийт 21 албан тушаалтныг Улсын Онцгой Комиссын дансанд төвлөрсөн хандиваас 21 сая төгрөг гаргуулан урамшуулсан баримтыг нийтэлж байна. Зориулалт ёсоор бол уг хандивын мөнгө нь гамшгийн бэлэн байдлыг хангахтай холбоотой хүн хүч, тоног төхөөрөмж, багаж хэрэгсэлд зарцуулагдах ёстой байтал дарга нар нэгнээ санаачлага гаргаж, арга хэмжээ зохион байгуулсан гэж урамшуулдаг мөнгөн урамшуулал биш юм.
Сэтгэгдэл (0)
Сэтгэгдэл бичигдээгүй байна