2020/10/25
USD 2,811

С.Зоригийг хөнөөсөн хэргээр “хооллоод” 22 жил боллоо

О.Шүрэнцэцэг
2020/10/02

УИХ-ын гишүүн, дэд бүтцийн сайд С.Зориг 1998 оны аравдугаар сарын 2-нд бусдын гарт хэрцгийгээр амь насаа алдсан.  Үүнээс хойш хэргийн учиг тайлагдалгүй 22  жил  өнгөрлөө. 

Анх С.Зориг агсны гэргий Б.Булганыг баривчилсан тухай 2015 оны арваннэгдүгээр сарын 17-нд ЦЕГ-аас мэдээлэв. Энэ мэдээтэй хамт уг хэргийг үйлдсэн эрэгтэй, эмэгтэй хоёрыг Орхон аймгаас баривчилсан тухай мэдээлэл бас цацагдсан. Үүнээс хойш удалгүй хүн амины хэргээр ял эдэлж байсан Ц.Амгаланбаатар, баривчлагдаж ирсэн Б.Содномдаржаа, Т.Чимгээ нар С.Зоригийн амь насыг хөнөөсөн болж таарсан.  Үүнээс эхлээд л олон нийт энэ хэргийн учир зангилаа тайлагдаж, захиалагчийг зарлах болов уу гэж хүлээсэн.  Гэвч  зарим нам, улстөрчид хэргийг уриа лоозон мэт ашиглаж, сонгууль бүрийн өмнө иргэдээс оноо авах хэрэгсэл болж ирлээ.  2020 оны УИХ-ын сонгуулиар ч энэ үйл явдал давтагдсан нь харамсалтай.

2016 онд С.Зоригийн хэрэг илэрсэн тухай хуулийн байгууллагынхан ээлжит мэдэгдлээ хийв. УЕП-ын орлогч Г.Эрдэнэбат ганцхан Монголын үндэсний телевизэд энэ хэргийн талаар ноцтой баримт илэрлээ гэж ярилцлага өгөөд, холбогдогч Ц.Амгаланбаатарыг С.Зориг агсны амьдарч байсан байрны 00-ын өрөөнд оруулж байгаад авсан бичлэгийг олон нийтэд үзүүлсэн юм.

Бас тэрээр “…Энэ хэргийн нотлох баримт дотор ил байдлаар нотлогдож байгаа олон зүйл бий. “1998 оны аравдугаар сарын 1-ний өдөр ийм хүнийг харсан. Ийм зүс царайтай хүн С.Зоригийн гэрийг асууж, сураглаад явж байсан. Гэрийнх нь гадуур сэжигтэйгээр олон удаа эргэлдсэн. Ийм зүс царайтай хүн байсан” гээд 1998 онд мэдүүлэг өгсөн гэрчээс хуулийн дагуу дахин гэрчийн мэдүүлэг авсан. Гэрчүүдээс өөр өөр орон зай, цаг хугацаанд “Таны ярьж байсан хүн эдгээр хүмүүс дунд байна уу” гэхээр олон хүний дундаас гэмт этгээдүүдийг эргэлзэх юмгүй зааж байсан. Хуульд заасан аргуудын нэг энэ л дээ” гэж ярьсан байдаг.

Удалгүй 2016 онд шүүх ажиллагааг эхлүүлж, 2017 онд бүх шатны шүүхээр эцэслэн яллаж дууссан. Ингэхдээ Ц.Амгаланбаатар, Б.Содномдаржаа нарт 25 жил, Т.Чимгээд 24 жилийн хорих ял оноосон байдаг. Хамгийн сүүлд 2017 оны наймдугаар сарын 7-ны өдөр тэдний гомдлыг Дээд шүүхийн ерөнхий шүүгч Ц.Зориг өөрөө даргалж хуралдаад Ц.Амгаланбаатар, Б.Содномдаржаа, Т.Чимгээ нарын ялыг 20 жил болгож эцэслэн шийдсэн байдаг.

Шүүх хурлын заримыг телевизээр шууд дамжуулж байв. Гэсэн ч энэ бүхэн нэг л эргэлзээтэй шийдэгдлээ гэсэн хардлага нийгэмд явсаар байсан юм.

Тэгвэл 2020 оны сонгуулийн өмнөхөн С.Зоригийн амь насыг хөнөөсөн хэрэгт дахин шинэ “нөхцөл байдал” илэрлээ. Энэ хэргийг дээрх гурван хүнд тохохын тулд тагнуул, шүүхийн шийдвэр гүйцэтгэх байгууллагынхан, бас прокурор, шүүх эрүүдэн шүүсэн гэдэг асуудал үүсч, энэ нь бараг нотлогдсон. Өөрөөр хэлбэл, энэ хэрэг дахин задарлаа.

АТГ-аас энэ хэрэгт холбоотойгоор тагнуулын хоёр ажилтныг, шүүхийн шийдвэр гүйцэтгэх байгууллагын хоёр ажилтныг саатууллаа. Шүүх тэднийг нь суллав. Заримыг нь хорьж ч чадаагүй гэдгийг эх сурвалжууд хэлж байна.

Тухайн үед ХЗДХ-ийн сайд Ц.Нямдорж “…С.Зориг агсны амь насыг хөнөөсөн хэрэгт холбогдуулан яллагдсан хэрэгтнүүдийг эрүүдэн шүүх ажил явагдсан. 1937 оны бүх аргыг хэрэглэсэн. Энэ нь тодорхой болсон” гэж мэдэгдлээ. Эрүүдэн шүүж хэрэг хүлээлгэсэн гэдгийг сайд нотлов. Ер нь бол энэ гурван хүнд С.Зоригийн амь насыг хөнөөсөн хэргийг үүрүүлэх хуулийн ажиллагааны үед ЦЕГ-ын даргаар Р.Чингис, ТЕГ-ын даргаар Б.Хурц, ШШГЕГ-ын даргаар Б.Билэгт, Улсын ерөнхий прокуророор М.Энх-Амгалан, Дээд шүүхийн ерөнхий шүүгчээр Ц.Зориг ажиллаж байв.

Улмаар Улсын ерөнхий прокурор М.Энх-Амгалан 2018 оны аравдугаар сарын 23-нд Хууль зүйн  байнгын хорооны хуралдаан дээр “…С.Зоригийн амь насыг хөнөөсөн гэж гурван хүнд ял оноосон. Хуулийн хүрээнд шүүхийн шийдвэр нэгэнт гарсан. Шүүхийн эцсийн шийдвэр гарсан учраас энэ гурван хүнийг гэм буруутай гэж үзэж байгаа. 18 жилийн дараа энэ хэрэг илэрсэн. Цаашид дахин шалгах шаардлагагүй. Хамгийн сүүлд Б.Булганы өгсөн мэдүүлэгт хэрэг бүртгэл нээгээд шалгаж байгаа” гэсэн байдаг.

Мөн ТЕГ-ын дарга Б.Хурц 2017 оны аравдугаар сарын 26-нд “…Хууль зүйн сайд Ц.Нямдорж С.Зоригийг хөнөөсөн хэргийн талаар нэлээд ярьж байна. Тиймээс бид энэ асуудалтай холбогдуулж тодорхой мэдээлэл өгөх нь зөв гэж үзлээ. Ц.Нямдорж гэдэг хүн сайд болох бүртээ энэ хэргийг шалгах Ажлын хэсгийг өөрчилж, нийт дөрвөн удаа тараасан байдаг. Ажлын хэсэгт ажиллаж байсан 32 албан хаагчийг сольсон. Одоо бас сайд болонгуут дахиад энэ хэрэг рүү орж байна. Аюулгүйн зөвлөлөөс гарсан зөвлөмжид энэ хэргийн ажлын хэсэгт мэргэжлийн алба хаагчид тогтвортой ажиллах ёстой гэж заасан байдаг. Улс төрийн болон бусад зорилгоор Цэндийн Нямдорж энэ хэрэгт нөлөөлж байна” гэж байв.

Гэвч шүүх өөрийн ялласан Б.Содномдаржаа, Т.Чимгээ хоёрыг эрүүдэн шүүсэн гээд Ж.Мөнхгал, С.Баярт, Б.Хурц нарт гурван жилийн хорих ял, Э.Өлзийбаярт нэг жилийн хорих ял, Г.Эрдэнэбатад гурван жилийн хорих ял, О.Бямбажавд хоёр жилийн хорих ял, Ү.Отгонбаярт хоёр жилийн хорих ял оноож, О.Бархасбадь, С.Эрдэнэбат нарыг цагаатгах шийдвэр гаргасан байдаг.   Үүнтэй зэрэгцэн хэргийг тойрсон улстөржилт ч намжаагүй.  ХЗДХ-ийн сайд  асан  Ц.Нямдорж Б.Содномдаржаа, Т.Чимгээ нарыг суллахыг шаардаж, УИХ-ын гишүүн Л.Болд, Ж.Батзандан нарын гишүүд хамтран ажлын хэсэг байгуулж, хэсэг ярив. Тэгээд сонгуулийн дараа эргээд л энэ хэргийг тоох хүнгүй боллоо.   Өнөөдөр 2020 оны аравдугаар сарын 2-н.  Тэр аймшигт хэрэг үйлдэгдсэн өдөр.

Эх сурвалж: “Зууны мэдээ” сонин


Сэтгэгдэл (4)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
66.181.161.50 |   2020/10/02
Энэ3 хүнхийсэн гэдгээ хүлээсэн юм билээ !!!!Амгаланбаатар тодорхой ярьсан байдаг Батүүл мөнгө өгсөнОтгонбаяр гуай бидэнтэй уулзсан гээд ээждээ энэ талаар хэлж хутаг шөвгөө нуусан тэрийг нь цагдаагийнхан хурааж авсан талаар харин цахиалагча аилчилэхгү йбайгаа нь сонин байна шинэ прокуроруудад найдаж байсан таг!!!!
Хариулах
45.55.47.163 |   2020/10/02
Мэнгэт Попзандан гээд хэдэн гарууд нэлээн завтай болжээ хахаха...өдөржин энэ тэндэхийн сайт бузарлаж суух гэж яаж үлдсэн хэдэн насаа барна даа. Настай болоод торны цаана сууж бга хүн муухай шүү, явж алхаж битгий хэл амиа хорлож чадахгүй.
Хариулах
139.5.219.247 |   2020/10/02
Махны машин хүчин чадлаараа ажиллаад захиалагч гэмт хэрэгтнийг олохыг хүсээгүй зөвхөн золиос хайж бий болсон гэмт хэрэг, хязгааргүй эрх мэдэлийн бүлэглүүдийн сонирхол ,бусдыг нийгмийг эрхшээлдээ байлгаж ашиг хонжоо хайсан луйвар хууль хүчний ялзрал эрх баригчдын юу хийхээс буцахгүй бол гутамшиг
Хариулах
202.9.46.124 |   2020/10/02
ОДОО ЦАХИАГИЙН ЭЛБЭГДОРЖИЙГ ТЭР АЙМШИГТ АЛЛАГА БОЛОН ХӨӨРХИЙ ХЭДЭН ХҮНИЙГ ХҮНИЙ Л БАЙЛГАЖ ТАМЛАЖ ТАРЧИЛГАЖ ЯРГАЛЖ ХЭРЭГ ХҮЛЭЭЛГЭСЭН БУЗАР МУУХАЙ ХЭЛМЭГДҮҮЛЭЛТТЭЙ ХОЛБОГДУУЛАН БАРЬЖ ХОРИОД ШАЛГАХ ЦАГ БОЛСОН ГЭЖ ОЛОН НИЙТ ҮЗЭЖ БАЙНА. ТЭР НЬ Ч ДЭЭР БАЙХ, АРД ТҮМЭН ЭЛБЭГДОРЖИЙГ ХАРДААД ОДОО БҮР ТОГТЧИХООД БАЙНА. ТЭР НЭГ ТОГТЧИХСОН ЭРГЭЛЗЭЭГ НЬ Ч ТАЙЛАХ ХЭРЭГТЭЙ. БУРУУГҮЙ БОЛ НЭГ ХЭСЭГ ХОРИГДОЖ БАЙГААД Л ГАРААД ИРНЭ БИЗ. БУРУУТАЙ БОЛ НӨГӨӨ ОЛОН ХУЛГАЙ ЛУЙВРЫН ХЭРЭГ ДЭЭРЭЭ НЭМҮҮЛНЭ БИЗ. ЭЛБЭГДОРЖ ЯМАР ХҮН ХОРЬЖ ХАНАЖ БАЙСАН БИШ. БУЛГАНГ ХИЧНЭЭН Ч САР ЖИЛЭЭР ХОРИУЛАВ. НӨГӨӨ ХҮМҮҮСИЙГ Ч ХИЧНЭЭН САР ЖИЛЭЭР ХОРИУЛАВ. КАПЛАД САНАА ЗОВООД БАЙЖ СУУЖ ЧАДАХГҮЙ БОЛООД ӨРШӨӨГӨӨД ЯВУУЛЧИХДАГ ЭТГЭЭД ХАРИН Ч САНАА АМАР ТЭР ХҮМҮҮСИЙН МАХЫ НЬ ИДҮҮЛСЭН ДЭЭ.
Хариулах