АШУҮИС-ийн дэд захирал Г.Батбаатар: Шүлснээс халдвар илрүүлдэг PCR оношлуурыг бүтээгээд, хэрэглээнд нэвтрүүлэхээр улсын бүртгэлд бүртгүүлсэн. ЭМЯ 10 мянган оношлуурыг шууд худалдан авах гэрээ байгуулаад, түүнийг үйлдвэрлээд, хүлээлгээд өгчихсөн. Харамсалтай нь энэ 10 мянган оношлуур бол нэг өдрийн хэрэглээ. Сургууль дээрээ бид нөөц бэлдээд 2000,3000 оношлуураар өдөрт 200, 300 хүнд шинжилгээ хийгээд явж байна. Энэхүү оношлуур бол эрэлт хэрэгцээтэй байгаа. Дүүргүүдийн молекул биологийн лабораториуд үүнийг хэрэглэе гэсэн хүсэлтүүдийг ирүүлж байгаа. Яагаад энэ оношлуурыг өргөн дэлгэр хэрэглэж болохгүй байна вэ гэхээр Их сургууль бол өөрөө академик байгууллага. Бизнесийн байгууллага биш. Яам маань өөрөө төрийн захиргааны төв байгууллага. Үүнийг шууд худалдан авах боломж нь хязгаарлагдмал байдаг юм байна. Өөрөөр хэлбэл заавал тендер зарладаг. Тендер зарлахаар Их сургууль тендерийнх нь шаардлагыг хангадаггүй. Янз, янзын барьцааны хөрөнгө, хийсэн ажлын туршлага гээд их сургууль ямар юмных нь тийм зүйл байх вэ. Тэгэхээр энэ хууль, эрх зүйн орчиндоо бас байна уу гэсэн бодолтой байна. Монгол хүмүүсийн нэг сэтгэхүйн саад байх шиг байна. Эд нар яг хийсэн үү?, чадсан уу? гээд л эргэлзээд байдаг. Өчигдөр би НЭМҮТ-д 20 хайрцаг оношлуурыг аваачиж өгөхөд, үүдэнд суудаг хүн нь "шүлсний оношлуур уу, муу юм гэсэн шүү дээ, наадах чинь" гэж байх жишээтэй. Бид бие биендээ итгэхээ больчихсон юм уу, Монгол судлаачдаа итгэж, Монгол үйлдвэрлэлээ дэмжье гэдэг ч үүний хажуугаар өнөөх Хятад, Солонгос оношлуураа худалдан авах ажил нь ч зогсдоггүй.Тэгэхээр энэ оношлуурыг оруулж ирж, ханган нийлүүлдэг компаниудын лобби их хүчтэй байдаг юм байна гэсэн дүгнэлтэд хүрээд байна.
25°C
Сэтгэгдэл (25)