2021/05/08
USD 2,811

Хятад сансрын станцынхаа гол модулийг тойрог замд гаргажээ

Н.Мичидмаа
2021/04/30

Хятад нь пүрэв гарагт “Чанчжэн-5” хүнд даацын тээгч пуужин ашиглан сансрын байнгын станцынхаа үндсэн модулийг тойрог замд гаргажээ. Тойрог замд гарсан үндсэн модуль “Тяньхэ” гэсэн нэртэй юм байна. Энэхүү үндсэн модуль нь тоног төхөөрөмжийн хэсэг, амьдрах хэсэг, залгагдах хэсэг гэсэн гурван хэсгээс бүрддэг аж. Амьдрах хэсэгт гал тогоо, бие засах газар, дэлхий холбоо барих хэрэгсэл, ажлын компьютер зэргийг байршуулсан юм байна. Амьдрах хэсгийг сансрын нисгэгчид урт хугацаагаар амьдрах, лабораторийн туршилт судалгаа явуулахад зориулсан аж. Түүнчлэн “Тяньхэ” нь сансрын нисгэгчдийн задгай сансарт гарах тусгай гарцаар тоноглогдсон юм байна.

 

Ойрын хугацаанд “Тяньчжоу-2” ачааны хөлгийг хөөргөн “Тяньхэ” модультай залгуулна. Дараа нь гурван сансрын нисгэгч буюу тайконавт бүхий “Шэньчжоу-12” хөлгийг хөөргөн залгуулснаар станц байнгын хүнтэй байх болно.

 

Станцын шаардлагатай бүх модулиудыг залгах, угсрах зэрэгт нэг жилийн дотор 11 удаа пуужин хөөргөх төлөвлөгөөтэй байгаа юм байна. Бүрэн угсарч дууссан станц нь 340-350 км-ийн өндөртэй тойрог замаар дэлхийн тойрон эргэдэг болно. Станц нь Т-үсгийн хэлбэртэй байх бөгөөд дунд хэсэгт нь “Тяньхэ” модуль, хоёр талд нь “Вэньтянь”, “Мэньтянь” гэсэн лабораторийн хоёр модуль мөн одон орны дуран авай бүхий “Сюньтянь” модуль залгагдах юм байна. Ийм сансрын станц нь байнгын байдлаар гурван сансрын нисгэгч солио хийх үеэр зургаан нисгэгч түр хүлээн авах чадвартай байх аж. 2022 онд бүрэн ашиглалтад орох станцыг ойролцоог 15 жилийн турш ашиглана гэж Хятадын сансрын технологийн академи тооцоод байгаа юм байна.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна