Чөлөөндөө гарсан Америкийн 120 гаруй генералууд Ерөнхийлөгч Жо Байдены сэтгэцийн болон биеийн эрүүл мэндэд төдийгүй 2020 оны сонгууль шударга явагдсан гэдэгт эргэлзэж байгаагаа ил тод мэдэгдсэн захидал бичжээ. “Flag Officers 4 America” сайт дээр тавдугаар сарын 12-нд гарсан нээлттэй захидалд “Ерөнхий командлагчийн сэтгэцийн ба бие махбодын байдлыг үл тоож болохгүй. Энэ хүн хаа ч явсан, өдөр ч тэр шөнө ч тэр үндэсний аюулгүй байдлын салбарт зөв оновчтой шийдвэр гаргаж чаддаг байх ёстой” гэсэн байна. Түүнчлэн “Ард түмний хүсэл зоригийг бодитоор тусгасан шударга, үнэн сонгуульгүйгээр манай Үндсэн хууль улс орон маань үгүй болно. Сонгуульд гаргасан зөрчил ил болохоор ХМТ ба Дээд шүүх нь нэн даруй арга хэмжээ авах ёстой болохоос 2020 оных шиг үл тоож болохгүй” гэжээ.
Цаашлаад Америкийн чөлөөндөө гарсан генералууд, адмиралууд нь “АНУ-ын шинэ захиргаа нь Конгрессоор оруулалгүйгээр 50 гаруй заавал гүйцэтгэх заалтад гарын үсэг зурснаас цөөнгүй ч өмнөх захиргааны үр дүнтэй бодлогыг халсан гэх зэргээр дарангуйлагчийн ааш авир гаргаж Америкийн иргэдийн Үндсэн хуулиар олгогдсон эрх рүү бүрэн хэмжээний дайралт хийлээ” гэжээ.
Эцэст нь генералууд нь америкчуудад хандан социализм, марксизм, прогрессивизм зэргийг эсэргүүцдэг улстөрчдийг дэмжихийг уриалаад дотоод улс төрийн бодлогоо боловсруулахдаа ашиг сонирхол хөөцөлдсөн бүлэглэлүүдэд бус харин нийт америкчууд, түүн дотроо дундаж ангид онцгой анхаарал хандуулж байхыг уриалсан байна.
Үүний өмнөхөн Францын чөлөөндөө гарсан генералууд Ерөнхийлөгчдөө хандан захидал бичиж улс оронд нь иргэний дайн нүүрлээд байгааг анхааруулж байсан юм.
Сэтгэгдэл (0)
Сэтгэгдэл бичигдээгүй байна