Их Британид ачааны машины жолооч хүрэлцэхгүй байгаагаас болж сүүний фермийн эзэд өдөр бүр хэдэн арван мянган литр сүү асгахаас өөр аргагүй болж байгаа тухай “Sky News” мэдээлжээ.
Британийн төв хэсэгт дөрвөн үе дараалан сүүний ферм ажиллуулж байгаа хүн “Sky News” сувагт ярихдаа сүүлийн хоёр сард хүргэх жолооч байхгүйгээс болж 40 мянган литр сүүг дэмий асгахаас өөр аргагүй болсон тухайгаа ярьжээ. Тэрээр “Зөндөө сүү сааж хураачхаад эцэст нь дэмий асгана гэдэг их хэцүү, сэтгэлд тун таагүй” гэсэн бөгөөд нийлүүлэгч нартаа таагүй сэтгэгдэл төрүүлэхгүйн тулд нэрийг нь хэлэхгүй байхыг хүсжээ.
Энэ хүний ферм 45 жилийн түүхэндээ цаг агаарын таагүй нөхцөлөөс болж хоёр удаа л сүүгээ аргагүйн эрхэнд асгаж устгаж байсан аж.
“Sky News” сувагтай энэ талаар уулзаж ярилцсан бусад фермерүүд бүтээгдэхүүнээ устгахгүйн тулд тээвэрлэлтийг өөрсдөө бие дааж хийдэг ч сүүг арай хямд үнээр авдаг жижиг компаниудад арга буюу зарсан тухайгаа ярьжээ.
“Sky News” сувгийн мэдээлж буйгаар өнгөрсөн жилд гэхэд л Нэгдсэн вант улсад нийт 15,3 тэрбум сүү үйлдвэрлэсэн. Тэгэхээр олон арван мянган сүүг дэмий асгаж устгаж оруулж байгаа, жижиг компаниудад хямд үнээр зарж байгаа нь удахгүй хэрэглэгчдэд таагүйгээр нөлөөлж эхлэх аж.
Ийнхүү асар их хэмжээний сүүг дэмий усталд оруулж байгаа нь бензиний хомсдолтой давхцаад Их Британийн хөдөлмөрийн зах зээл дээр үүссэн асуудлын цар хүрээ ямар байгааг харуулсан явдал гэдгийг “Sky News” суваг онцолжээ.
Их хөдөлмөрөөр олж авсан сүүг устгуулахгүй байх арга хэмжээг зарим хүн сэдсэн байна. Тухайлбал, Роб Хантхэтч гэгч хүн ийм ажил хийдэг бөгөөд тэрээр асгах гэж байсан сүүг тал үнээр нь худалдан аваад тусгай хөрөнгөөр ээдүүлж, бяслаг хийхэд ашиглах боломжтой болгодог юм байна. Фермерийн эзэн утсаар ярьснаас хойш сүүг амжиж авах хүртэл ердөө 1-2 цаг байдаг гэнэ. Үүнээс хэтэрвэл фермийн эзэн арга буюу сүүг асгахаас өөр аргагүй болдог. Хантхэтч нь одоогоор 160 мянган лит сүүг асгагдахаас авраад байгаа ч 80 мянган литрийн “аварч” чадаагүй гэж “Sky News” сувагт ярьжээ. Гэхдээ удахгүй өвөл цас их орвол тээвэрлэлт удааширч, нөхцөл байдал улам таагүй болж магадгүй гэсэн айдас байгаа аж.
Харамсалтай нь, логистикийн асуудлаас болж сүүгээ асгаж устгах нь фермерүүдэд тулгараад байгаа цор ганц асуудал биш гэдгийг “Sky News” онцолсон байна. Европ тивийг хамарсан шатдаг хийн үнэ тэнгэрт хадсаны улмаас бэлчээрт ашигладаг бордооны үнэ гурван долоо хоногийн дотор 150 хувиар нэмэгдсэн, бензиний үнэ долоо хоногийн дотор 10 пенсээр нэмэгдсэн аж.
Сэтгэгдэл (0)
Сэтгэгдэл бичигдээгүй байна