Сайхан залуу аавынхаа тэргүүнд буурал орсныг анх үзээд
Саваагүй томоогүй хүүхэд насаан би тэр жилийнх нь шувуудтай хамт буцаасан
Санчиганд нь нэмэх мөнгөн сорны тоолон жаргаана даа тэгвэл гэхэд
Санаснаар даанч болохгүй явна ааваа хэмээн яруу найрагч Ц.Хулан бичсэн байдаг.
Үнэхээр л аав гэдэг амьдрал гэх их далайн үүдийг нээж өгөх нэгэн уран бүтээлч билээ. Бид бүхэн ааваа хэмээн дуудах тэнгэрээс ээж гэх дэлхий дээр буудаг. Алдаа бүхэнг оноо болгож өгдөг аав хүн хамгийн сайхан нь. Мэдээж аавдаа хайргүй байхын аргагүй. Биднийг бүтээсэн бүтээлч болохоор. Аав бүхэн л хүүгийнхээ анхны баатар, охиныхоо анхны хайр нь байдаг гэдэг. Харин маргааш буюу найман сарын найман аавуудын баярын өдөр болох гэж байна. Энэхүү өдрийг "Монголын эрэгтэйчүүдийн холбоо" 2005 оноос хойш жил тэмдэглэж ирсэн уламжлалтай. Аавуудын баярын утга учрыг нь аав нар үр хүүхдүүдийнхээ өмнө хүлээсэн үүргээ хэрхэн биелүүлж байгаагаа үнэлж цэгнэх өдөр гэж хэлж болох юм.
Харин энэ баярыг дэлхийн 17 улсад тэмдэглэн өнгөрөөдөг. Манай улс 18 дахь нь болж байсан түүхтэй. Хамгийн анх 1910 онд АНУ-ын Вашингтон мужийн Дод нэртэй охин өөрийн аав Смартад зориулж энэ өдрийг бий болгосон гэдэг. Түүний ээж бага дүүг нь төрүүлэхдээ насан эцэслэсэн бөгөөд тэр цагаас аав нь 5 хүүхдээ ганцаараа өсгөжээ. 1966 онд АНУ-ын ерөнхийлөгч энэ өдрийг албан ёсоор "Аавуудын баярын өдөр" болгон зарласан аж. Харин жил бүрийн 5 дугаар сарын 19-нд Англи, Франц, Бельги улсууд энэ баярыг тэмдэглэн өнгөрөөдөг уламжлалтай.
Ю.Нямгэрэл
Сэтгэгдэл (0)
Сэтгэгдэл бичигдээгүй байна