Дэлхийд ашиг, орлогоороо гуравдугаарт ордог Их Британийн "Tesco" сүлжээ ирэх оны хоёрдугаар сараас эхлэн ямар ч хүнсний хаягдалгүй болохоо албан ёсоор зарлалаа. Учир нь дэлгүүрүүдэд зарагдаагүй үлдсэн хүнсийг тухайн орон нутгийн буяны байгууллага, ядуу, орон гэргүй хүмүүст туслах нийгэмлэгүүдэд хандивлахын зэрэгцээ дахин боловсруулах төвд хүргэж, түлш үйлдвэрлэхээр шийдвэрлэжээ. Мөн тодорхой хувийг амьтдын хоол хүнсэнд зарцуулах юм. Тус корпорацийн гүйцэтгэх захирал Дейв Льюисийн мэдэгдэж буйгаар энэхүү сайн дурын үйл ажиллагаанд Их Британи дахь бүх салбар дэлгүүр нь хамрагдах ажээ.
"Tesco" сүлжээ 2017 оны байдлаар нийт 10 сая тонн хүнсийг Британийн ард түмэнд нийлүүлсэн бөгөөд түүний 0,7% буюу 70 мянган тонн нь хаягдал болсон байна. Тиймээс хаягдлыг хэрэгцээтэй салбарт нь түгээхээр болсон нь энэ юм.
Хоол хүнсний хаягдал нь зөвхөн эдийн засгийн хохиролтой бус байгаль орчинд хортой нөлөө үзүүлдэг. Үүнд химийн бордоог илүү ихээр хэрэглэж, хүнсний тээвэрлэлтэд шатахууны хэрэглээ, ялзарсан хоол хүнсний хог хаягдал нэмэгдсэнээр улам их метан ялгаруулан, хүлэмжийн хийг ихэсгэж байна. Жил бүр дэлхийн хүн ам 1.3 тэрбум тонн буюу нийт үйлдвэрлэж буй хүнсний бүтээгдэхүүний гуравны нэгийг хаяж үрэгдүүлдэг байна.
Сэтгэгдэл (0)
Сэтгэгдэл бичигдээгүй байна