Дэлхийн уран гулгалтын хоёр удаагийн аварга, олимпийн наадамд багаараа тэргүүн байрыг эзлээд байгаа Канадын тамирчин Мийган Духамел нохойн махны худалдааг эсэргүүцдэг байна. Нохойн махыг Азийн зарим орнуудад хүнсэнд хэрэглэдэг бол энэ удаагийн олимпийн наадмыг зохион байгуулж байгаа Өмнөд Солонгос улсад ч мөн хүнсэнд хэрэглэдэг байна. Духамел өнгөрсөн жил нэгэн нохойг аварсан бөгөөд "Би "Free Korean Dogs" гэдэг нохой хамгаалах байгууллагатай холбогдсон. Тэд нохдыг авч явж, шинэ гэр, шинэ эзэнтэй болоход нь тусалдаг. Одоо би дахиад нэг амьтантай боллоо" гэж хэлсэн байна. Тэрээр аварсан нохойндоо Мутэ гэсэн хоч өгчээ. Тэрээр өмнө нь мөн л орон гэргүй нэг нохойг аварч байсан бол өөрийн цахим сүлжээнд хайртай амьтдынхаа зурагнуудыг оруулдаг байна. Өмнөд Солонгос улсад нохойн мах идэх явдал элбэг байдаг бол жилд нэг сая орчим нохойн махыг зооглодог байна. Тэгвэл олимпийн наадмыг зохион байгуулж байгаа Пёнчан хотын захиргаа наадмын үеэр нохойн мах болон түүгээр хийсэн хоолыг зарахыг хориглосон боловч хоёр зоогийн газраас бусад нь энэхүү шийдвэрийг дагаагүй байна. Мийган Духамел нохойн махны худалдааг зогсоохын төлөө тэмцэж байгаа бөгөөд наадамд оролцож байгаа бусад тамирчдыг ч мөн нохдыг аврах ажилд оролцохыг уриалсан байна.
Сэтгэгдэл (0)
Сэтгэгдэл бичигдээгүй байна