Сан Антонио Спөрс багийн лидер Кавай Леонард энэ улиралд бэртэл гэмтлийн улмаас тун цөөхөн тоглолтод оролцсон билээ. Тэгвэл дасгалжуулагч Поп Кавайг энэ улиралд дахин тоглохгүй байх гэж хэлжээ.
Тэрээр орон нутгийн цагаар Лхагва гарагт ярилцлага өгөхдөө "Улирал дуусахад тийм ч олон тоглолт үлдээгүй. Кавай одоо хүртэл бэлэн болоогүй байна. Улирлын төгсгөлд бүрэн эдгээгүй тоглогчоо талбайд гаргана гэдэг тийм ч ухаалаг шийдвэр биш. Тиймээс Кавай энэ улиралд бэртлээс эргэн ирэх магадлал тун бага. Улирал дуусахаас өмнө тоглолтод оролцвол би хувьдаа маш их гайхна" гэж хэлжээ.
Леонард бэртлийн улмаас энэ улиралд ердөө 9 тоглолтод оролцсон. Түүний хувьд өнгөрсөн улиралд хөлөндөө авсан бэртэл нь бүрэн эдгээгүй байсан бөгөөд улирлын дундуур нэмж мөрөндөө бэртэл авсан юм.
Түүний хувьд 2016 - 2017 оны улиралд 25.5 оноо дунджилж, үнэ цэнэтэй тоглогч шалгаруулах санал асуулгад гурав дугаар байранд жагссан билээ.
Багийн лидерээ бэртэлд алдсан Сан Антонио Спөрс баг энэ улиралд 35 хожил, 24 хожигдолтойгоор өрнөд бүсийн гурав дугаар байранд жагсаж байна.
Сэтгэгдэл (0)
Сэтгэгдэл бичигдээгүй байна