126: "АН", "МАН"-ын хүчтэй өрсөлдөгч Үндэсний эвсэл ба Н.Номтойбаяр

Сонгуулийн тухай шинэ хуулиар бид 126 гишүүнтэй болно. Тэдний нэг эсэхийг таамаглах цувралыг бид "Үндэсний эвсэл”-ийн дарга Н.Номтойбаяраар үргэлжлүүлж байна. Улсын хэмжээнд нэр дэвшихээ мэдэгдээд буй тэрээр улс төрийн хувьд шинэ хүн биш. Тийм ч учраас ирэх сонгуульд АН, МАН-ын хүчтэй өрсөлдөгч байх болов уу гэсэн хүлээлт бий. Цагтаа МАН-ын урдаа барьдаг залуучуудын нэг явсан тэрээр МАН-ын НАМЗХ-ны дэд ерөнхийлөгчөөс эхлээд УИХ-ын гишүүн,  дэд сайд, сайд хүртэл ажиллаж явсан туршлгагатай нэгэн. МАН-ын дотоод улс төрийн зөрчлөөс болж түүний гишүүнчлэлийг түдгэлзүүлсэн гэдэг бөгөөд өөрийн хүсэлтээр Улсын Их Хурлын гишүүний бүрэн эрхээс татгалзаж байсан юм. Үүний дараа тэрээр 2020 оны их хурлын  сонгуульд бие даан нэр дэвшихээр бүртгүүлж, шоронгоос хүртэл нэр дэвшиж явсан гээд сонирхолтой содон түүхтэй нэгэн билээ.  Харин энэ удаагийн сонгуульд тэрээр эвслээ удирдан орно, сонгуульд үнэхээр хүчтэй өрсөлдөгч болох эсэх нь намаасаа хэнийг нэр дэвшүүлэх вэ гэдгээс хамаарна гэх таамаг хүлээлт  байгаа юм. Нам эвслүүд энэ сарын 14-20нд нэр дэвшигчдээ тодруулах бөгөөд СЕХ-ноос ирэх 6 дугаар сарын 10-нд олон нийтэд зарлаж үнэмлэхийг гардуулах юм.