БНАСАУ цөмийн зэвсгийн туршилтын талбайгаа тавдугаар сарын 23-25-ны өдрүүдэд устгах болсноо зарлалаа. АНУ-ын Ерөнхийлөгч Дональд Трамп энэхүү шийдвэрийг "Ухаалаг, найрсаг үйлдэл байна" гэж өөрийн "twitter" хуудастаа сайшаажээ.Устгалын хүрээнд Умард Солонгосын хойд хязгаарт газар доор байрлах цөмийн зэвсгийн туршилтын бүсүүдийг тэсэлж, зам талбайг нь хаахаар болсон байна. Мөн ажиглалт, судалгааны төвүүдийг хаахаар болжээ. БНАСАУ-ын Гадаад харилцааны сайд АНУ, БНСУ, БНХАУ, ОХУ, Их Британийн сэтгүүлчдэд энэхүү үйл ажиллагааг сурвалжлах эрх олгож байгаагаа мэдэгдсэн байна. Дээрх таван улсын сэтгүүлчид Бээжингээс БНАСАУ-ын эрэг рүү цэргийн онгоцоор ирж, харин цөмийн туршилтын бүс рүү галт тэргээр хүрэх юм байна.Үүний зэрэгцээ АНУ-ын Төрийн нарийн бичгийн дарга Майк Помпео "БНАСАУ цөмийн зэвсэггүй бүс болж чадвал АНУ хоригоо цуцалж, эдийн засгийн өсөлтийг нь дэмжихэд бэлэн байгаа"-гаа мэдэгджээ.Майк Помпео "Хэрвээ БНАСАУ цөмийн зэвсэггүй болбол бид мэдээж хоригоо зогсоох болно. Түүнээс ч илүүг бид амлаж чадна. Ерөнхийлөгч Дональд Трамп ч амлалт өгсөн. Хэрвээ АНУ, цаашлаад дэлхий цөмийн зэвсгийн аюулаас ангижирвал бид БНАСАУ-ын ард түмэнд гайхалтай боломжууд олгох болно. Ким Чен Ун энэ боломжийг ард иргэддээ олгохыг хүсэж байгааг би мэдэж байна. Бид БНСУ-тай өрсөлдөхүйц бодит эдийн засгийн хөгжил цэцэглэлтийг бий болгох боломжийг Умард Солонгост өгч чадна" гэж мэдэгдсэн байна.БНАСАУ-ын удирдагч Ким Чен Ун өнгөрсөн сард БНСУ-ын Ерөнхийлөгч Мун Жэ Интэй уулзахдаа цөмийн зэвсгийн туршилтын бүсээ устгах амлалт өгсөн юм. Үүнийгээ ч биелүүлж байгаа нь талуудын харилцааг сэргээхэд чухал алхам болно олон улсын шинжээчид дүгнэж байна.Ким Чен Ун 2018 он гарснаас хойш АНУ, БНАСАУ-ын талуудын харилцааг зөөллөхөөр олон алхам хийж, арга хэмжээнүүд хэрэгжүүлээд байгаа юм. Өнгөрсөн долоо хоногт л гэхэд Ким Чен Ун АНУ-ын гурван иргэнийг суллаж, эх оронд нь буцаасан бөгөөд үүнд талархаж байгаагаа Дональд Трамп илэрхийлсэн юм. Эдгээр шийдвэрүүд нь зургаадугаар сарын 12-нд Сингапурт болох Дональд Трамп, Ким Чен Ун нарын уулзалтыг амжилттай болоход дэмжлэг болж байгааг олон улсын шинжээчид онцолж байна.
Сэтгэгдэл (0)
Сэтгэгдэл бичигдээгүй байна