Ерөнхий сайд асан С.Баяр, Ч.Сайханбилэг болон Сангийн сайд асан С.Баярцогт нарыг Оюу толгойн хөрөнгө оруулалтын гэрээг үзэглэхдээ эрх мэдэл, албан тушаалын байдлаа урвуулан ашиглаж, бусдад давуу эрх олгосон байж болзошгүй гэх хэрэгт буруутган яллагдагчаар татан шалгаж байгаа билээ. Тэднийг хоёр сар орчим цагдан хорьж, шалгасны эцэст хилийн хориг тавьж, батлан даалтад гаргах шийдвэрийг шүүхээс гаргасан байдаг. Одоо С.Баяр, Ч.Сайханбилэг, С.Баярцогт нарыг гадуур шалгаж байгаа юм. Тэгвэл хэргийн мөрдөн байцаалт ямар шатандаа яваа талаар АТГ-аас тодрууллаа. Тус газрын Мөрдөн шалгах хэлтсийн дарга Э.Идэрцог "Энэ хэрэг шалгагдаж байна. Цаг хугацаа их шаардсан, нэлээн ажиллагаатай хэрэг. Тиймээс мөрдөн шалгах ажиллагаа хараахан дуусаагүй байна. Хэн нэгэн албан тушаалтан, хэсэг бүлэг хүний албан шаардлагаар хэргийг хурдан шалгана гэх ойлголт байхгүй. Хүний гэм буруутай, буруугүй гэдэг асуудал яригдаж байна. Мөрдөн шалгах ажиллагаанд яллах, эсвэл цагаатгах нотлох баримтыг прокурорын хяналт дор цуглуулдаг. Энэ чиг үүргээ биелүүлж, хуульд заасан ажиллагаагаа үргэлжлүүлж байна" гэх мэдээллийг өглөө.
Сэтгэгдэл (0)
Сэтгэгдэл бичигдээгүй байна