Согтуугаар жолоо барихын аюулыг өөрийн эрэмдэг болсон дүр төрхөөрөө сэрэмжлүүлж байсан Жаки Сабуридо 40 насандаа Гуатемалд хорт хавдрын улмаас таалал төгсчээ.
1999 онд 20 настай байхдаа Жаки Сабуридо дөрвөн найзтайгаа Техасын Остин хотод төрсөн өдрийн үдэшлэг тараад гэртээ харьж явжээ. Тэдний суусан машин согтуу жолооч жолоодож явсан машинтай мөргөлдөж, улмаар машин хормын төдийд шатсан байна. Энэ хэргээс хойш Сабуридо "Согтуугаар жолоо барихын эсрэг" аяныг явуулжээ.
Машинд байсан хоёр зорчигч газар дээрээ амиа алджээ. Сабуридо урд талын зорчигчийн суудалд сууж явсан бөгөөд машинд гарсан галын улмаас 45 секундын дотор биеийнх нь 60 хувь шатсан юм.
Тэрбээр 100 гаруй удаагийн мэс засалд оржээ. Венесуэлийн Каракаст өссөн тэрбээр АНУ-д сар хүрэхгүй хугацаанд эрүүл мэндийн даатгалгүй оршин сууж байсан аж. Түүнд үзүүлсэн эмнэлгийн үйлчилгээ 5 сая долларт хүрчээ.
18 настайдаа согтуугаар жолоо бариад осол гаргасан Регги Стефей 7 жилийн хорих ял эдэлсэн
Тухайн үед осол гаргасан жолооч Регги Стефей 18 настай байсан ба санамсаргүйгээр хүн амины хэрэг үйлдсэн хэргээр долоон жилийн хорих ял эдэлж, 2008 онд суллагдсан байна.
Ослын дараа Сабуридо Техасын Зам тээврийн газрын согтуугаар жолоо барихын эсрэг аяны тэмцэгч болж, олон тооны сургуулиудад өөрийн царай төрхөөр согтуугаар жолоо барихын аюулыг ойлгуулж явжээ. Тэрбээр Опра Уинфригийн шоунд хоёр ч удаа оролцсон байна.
Сабуридо 100 гаруй удаагийн мэс засалд орсон
"Хэрвээ хэн нэгэн хүнд ухаантай шийдвэр гаргахад туслах бол би камерын өмнө чих, хамар, хөмсөг, үсгүйгээр хэдэн мянган удаа суухад бэлэн байна" хэмээн олон удаагийн илтгэлдээ хэлж байжээ.
"Энэ бол миний энэ ертөнцөд хийх ёстой зорилгын маань нэг. Миний бие, нүүр царай бусдад тусалж чадаж байвал яагаад болохгүй гэж? " хэмээн тэрбээр аяны хүрээнд хийсэн нэгэн бичлэгтээ хэлсэн байна.
Эх сурвалж: http://news.gogo.mn
Сэтгэгдэл (0)
Сэтгэгдэл бичигдээгүй байна