Ким Жон Ун ба Дональд Трампын уулзалтын нэг жилийн ойгоор Хойд Солонгоын мэдээллийн төв агентлаг нь АНУ-д хандан дайсарсан яриагаа зогсоохыг уриалжээ.
Тус уриалгад АНУ-ын дайсарсан ярианаасаа татгалзахгүй бол “хэлэлцээний явцад хүрсэн бүх тохиролцоо нь тэдгээрийг буулгасан цаасны үнэд ч хүрэхгүй” гэж анхааруулсан байна. Мөн “БНАСАУ нь тусгаар тогтнолыг эрхэмлэдэг тул АНУ-ын өрөөсгөл, дээрэнгүй бодлого нь энд хэзээ ч амжилт олохгүй” гэжээ.
Зургаадугаар сарын 4-нд Хойд Солонгосын Гадаад харилцааны яамнаас мэдэгдэл хийж, Вашингтоны зүгээс хэтэдсэн даралт шахалт үзүүлж байгаагийн улмаас Солонгосын хойгийг цөмийн зэвсэггүй болгох хэлэлцээнээс гарах болсоноо мэдэгдсэн юм. АНУ-ын тавьж байгаа шардлагуудыг Умард Солонгос нь “нөгөө талаа үг дуугүй бууж өгөхийг шаардсан хэрэг” гэж нэрлэсэн.
Хэлэлцээ ийнхүү бүтэлгүйтсэн ч АНУ нь Хойд Солонгост үзүүлэх дарамтаа улам нэмэгдүүлэхээр шийдсэн бололтой. Тухайлбал, АНУ-ын Төрийн департаментаас хэрэгжүүлдэг урамшуулалын хөтөлбөрт БНАСАУ-ыг мөнгө угаах, кибер гэмт хэрэгт оролцох, үй олноор хөнөөх зэвсэг тараах зэрэг ажилд оролцож байгаа талаарх баттай мэдээлэл өгвөл 5 сая ам.долларын шагнал өгнө гэсэн шинэ заалт орж иржээ. Ингэхдээ Хойд Солонгосын хийж байгаа нүүрс, газрын тос ба газрын тос боловсруулалтын бүтээгдэхүүний наймаа, хилийн чанадад ажиллаж улсынхаа Засгийн газарт ихээхэн мөнгө өгдөг хилийн чанад дахь ажилчид, тус улс руу хийгдэж байгаа тансаг зэрэглэлийн бүтээгдэхүүний импортын тухай мэдээллийг түлхүү сонирхоно гэжээ.
Энэ зуур Хойд Солонгосыг тойрсон бас нэгэн дуулиан тархаад байна. 2017 онд Майлазид алагдсан Ким Жон Уны ах Ким Жон Намыг Америкийн ТТГ-ын мэдээлэгч байсан гэж “The Wall Street Journal” гэж мэдээллээ.
Тус сонины мэдээлж буйгаар Ким Жон Нам нь Тагнуулын төв газрын мэдээлэгчтэйгээр уулзахаар Малайз руу нүүж очсон байж. Гэхдээ АНУ-ын Засгийн газарт алба хашдаг байсан цөөнгүй хүн Ким Жон Намыг удаан хугацаагаар Хойд Солонгосоос гадуур амьдарсан, Пеньянд ямар ч эрх мэдэлгүй хүн байсан тул улсынхаа дотоод байдлын талаарх ямар нэг чухал мэдээлэл өгч чадахгүй байсан гээд түүнийг Хятад гэх мэт бусад орны тусгай албаныхантай ч холбоотой байсан гэжээ.
Сэтгэгдэл (0)
Сэтгэгдэл бичигдээгүй байна